Dokumente word tans onder boere in Noordwes versprei om hul vloedskade te bepaal, sê die provinsiale regering.
Luidens ‘n verklaring versprei Noordwes se departement van landbou en landelike ontwikkeling se rampbestuurseenheid die dokumente. Mnr. Boitumelo Tshwene, die LUR vir landbou en landelike ontwikkeling, sê na die swaar reën en vloedtoestande is hulle bekommerd dat boere skade gely het en wil hulle graag bepaal /vasstel wat dié skade beloop.
“Ons is nie in staat om werklik te bepaal wat die situasie is nie, ons moet eers wag vir die watervlakke om te daal”, aldus Tshwene.
1200 ha geraak
Volgens Tshwene is hulle bewus van sowat 1200 ha se landbougrond wat weens die reëns in die slag gebly het. Die meeste hiervan is lusern-, sonneblom- en mielielanderye. Nog geen veeverliese is by die departement aangemeld nie.
Boere word dus versoek om met hulle plaaslike landbou-owerhede in verbinding te tree en die nodige dokumente te voltooi. Beamptes van die departement sal dan die skade op plase nagaan om hulself van elke situasie te vergewis.
Intussen sê Tshwene nog swaar reën word verwag en hy moedig boere aan om hulself na hoër liggende gebiede te verskuif.
20 Januarie 2011
