Voedselvermorsing reg oor die verskaffingsketting kan nie bekostig word in ’n land waar 2,5 miljoen mense weekliks honger ly nie. Dit is ’n komplekse kwessie wat van plaas tot vurk kop uitsteek. Daarom het die Shoprite-groep besluit om ’n sistemiese benadering met omvattende oplossings te volg om dié kwessie hok te slaan.
Mnr. Sanjeev Raghubir, Shoprite se volhoubaarheidsbestuurder, sê die beste manier om vermorsing te vermy, is om dit te voorkom.
Dit word gedoen deur prosedures te hersien vir die plaas van bestellings, aanvulling en watter reekse aangehou word en data-analise in te span om brandpunte vir voedselvermorsing te identifiseer. Deur, byvoorbeeld, die produkreeks by Shoprite se delikatessens te optimaliseer, is voedselvermorsing by dié afdeling met 11% verminder.
Kunsmatige intelligensie (KI) is nog ’n wapen wat in die stryd teen voedselvermorsing ingespan word. Dit word tesame met masjienleer gebruik om verkope by winkels te voorspel. Bestellings vir aanvullings word outomaties geplaas. Dit verseker dat voorraad altyd beskikbaar is, terwyl voedselvermorsing verminder word.
Die KI-model neem verskeie faktore in berekening. Byvoorbeeld, ’n winkel wat naby aan ’n jaarlikse sportbyeenkoms geleë is, sal outomaties meer kitsmaaltye op daardie spesifieke dag beskikbaar hê.
Hoewel dié planne en prosedures voedselvermorsing verminder, word dit nie uitgeskakel nie. Surplus voedsel wat steeds eetbaar is, moet dus ’n plan mee gemaak word. Daarom skenk die Shoprite-groep daagliks meer as 120 000 maaltye aan meer as 450 liefdadigheidsorganisasies om honger te verminder en voedselsekerheid te verbeter.
Die afgelope jaar is surplus voedsel ter waarde van R138 miljoen geskenk. Shoprite bemiddel ook die skenk van surplus vrugte en groente direk van plase na liefdadigheidsorganisasies.
Alle surplus voedsel is egter nie eetbaar nie, maar daarvoor het Shoprite ook ’n plan. Weekliks word sowat 44 ton voedselafval, meestal droë produkte soos pasta, ontbytgrane en meel, in voer omskep.
Mnr. Angus McIntosh, herlewingsboer van die Spier-wynlandgoed by Stellenbosch wat sy produkte onder die handelsnaam Farmer Angus bemark, ontvang weekliks meer as 4 ton oneetbare groente en vrugte van die Basson-verspreidingsentrum in Kaapstad. Hy voer dit vir sy varke en lewer weer fynproewers-kouevleise aan Checkers.
Selfs die meer as 900 000 liter gebruikte kookolie wat verlede jaar by Shoprite en Checkers se delikatessens herwin is, word nie vermors nie. Dit word in onder meer biodiesel omskep. Organiese afval word ook bestuur en verlede jaar is 236 ton voedselafval in kompos omskep.
Altesaam het Shoprite verlede jaar voorkom dat 3 305 ton voedselafval op stortingsterreine beland en sy koolstofspoor met byna 8 400 ton verminder.
