'n Taakspan is op die been gebring om die kwessie van inenting teen voëlgriep te bekyk.
Dit volg nadat senior verteenwoordigers van die bedryf mnr. Senzeni Zokwana, Minister van Landbou, Bosbou en Visserye, ontmoet het om die moontlikheid te bespreek.
Die partye het ooreengekom dat 'n besluit oor inenting op wetenskaplike navorsing oor die langtermynvoordele vir die sektor en die land gegrond sal wees.
Die taakspan sal wetenskaplik gronde ondersoek, lui 'n verklaring deur die departement. Die partye het ook oor oplossings en versagtingstrategieë vir die onlangse H5N8-uitbreking gepraat.
“Die huidige uitbreking bedreig die bestaan van die Suid-Afrikaanse pluimveebedryf, asook werkgeleenthede in die sektor,” lui die verklaring. Die bedryf het sy kommer uitgespreek oor vergoeding en riglyne vir die beginsels rakende vergoeding aan plase wat deur die siekte geraak word.
Behoorlike riglyne kom
Die departement het onderneem om riglyne vir vergoeding te voorsien. Die bedryf het ook toestemming gevra om bevrugte eiers in te voer, om die gaping te oorkom wat ontstaan het nadat voëls weens voëlgriep van kant gemaak is.
Die departement het onderneem om dié versoek spoedig te oorweeg. Intussen was daar volgens die internasionale organisasie vir dieregesondheid (OIE) se voëlgriepwebblad vandeesmaand verdere uitbrake van die H5N8-virusstam in Suid-Afrika.
Die siekte is die eerste keer op 'n plaas in die AbaQulusi- munisipale gebied (Vryheid) in KwaZulu-Natal gevind, waar 50 000 hoenders toe van kant gemaak is.
Daar was ook 'n aanmelding onder agterplaashoenders in die munisipale gebied, Dr. Pixley ke Seme (Volksrust, Wakkerstroom, Amersfoort) in Mpumalanga, waar 135 hoenders van kant gemaak is.
