Mnr. Kevin Lovell, hoof uitvoerende beampte van die Suid-Afrikaanse Pluimveevereniging (SAPV), het gesê dat dit onwaarskynlik lyk dat enige moontlike heeltydse teenstortingstariewe teen vroeg in Januarie in plek sou wees.
Die tariewe het ses maande lank vir invoer uit Nederland, Brittanje en Duitsland gegeld. Voëlgriep het in dieselfde drie lande uitgebreek en daarom is invoer uit dié lande sedert 11 November verbied.
Lovell sê die Kommissie vir Internasionale Handelsadministrasie (Itac) se sogenaamde kernfeitebrief, wat deel is van die hersiening van die voorlopige tariewe, bevestig min of meer die strekking van die voorlopige tariewe. “Invoerders probeer die proses deur regsaksies sloer, maar ons staan dit teen,” het Lovell gesê.
Mnr. David Wolpert, hoof- uitvoerende beampte van die Assosiasie van Vleisinvoerders en –uitvoerders (AMIE), sê egter dié organisasie het die inhoud van die eerste brief betwis en geëis dat Itac ’n nuwe brief uitreik. Ten tyde van die skryf van dié berig het AMIE die tweede brief nog bestudeer. AMIE se besware teen die eerste brief was dat korrespondensie van alle partye nie in ag geneem is nie.
Itac se volgende stap is om ’n aanbeveling oor tariewe aan dr. Rob Davies, Minister van Handel en Nywerheid, te maak, wat dit moet oorweeg. Indien hy op permanente tariewe sou besluit, moet dit deur mnr. Mcebisi Jonas, Adjunkminister van Finansies, in dieStaatskoerant afgekondig moet word. Wolpert het gesê dit sou moeilik wees om al dié prosesse teen 2 Januarie te kon afhandel.
Lovell het gesê voordat die voëlgriepverbod ingestel is, is groot hoeveelhede hoender steeds uit Nederland en Brittanje ingevoer, ondanks die teenstortingsmaatreëls. “Die tariewe was dus nie genoeg om invoerders te ontmoedig nie.” Volgens invoersyfers is meer hoender van Januarie tot Oktober 2014 ingevoer as in dieselfde tyd die vorige jaar. Syfers vir invoer ná die verbod was teen druktyd nog nie beskikbaar nie.
Volgens Wolpert het die verbod nie ’n onmiddellike invloed op voorraad in Suid-Afrika gehad nie. “Daar was genoeg voorraad in die stelsel vir Kersfees. Hoender word ingevoer uit onder meer Brasilië, Argentinië, Spanje, Frankryk en Thailand.” Wolpert het verwag dat daar minstens nog vir Januarie genoeg voorraad sou wees, maar dat verbruikerspryse daarna weens laer voorraadvlakke kan styg.
