Die Regering het die algehele verbod op die verkoop van lewende hoenders vervang met 'n stel voorwaardes waarvolgens dit gedoen mag word.
Mnr. Senzeni Zokwana, Minister van Landbou, Bosbou en Visserye, het vanoggend (Donderdag, 29 Junie) op 'n mediakonferensie gesê die verbod was ingestel om die verspreiding van die H5N8-voëlgriepvirus te voorkom.
Dit het egter groot kommer landwyd veroorsaak omdat dit mense se lewensbestaan raak. “Die maatreël is in belang van die land en die breër pluimveebedryf ingestel, en ek kan julle verseker dit is nie ligtelik geneem nie,” het Zokwana gesê.
Oplossing gevind
Amptenare en pluimveeprodusente het egter 'n oplossing gevind waarmee siektebeheer en naspeurbaarheid verbeter kan word, terwyl ook verseker word dat mikro-ondernemings hul bedrywighede kan voortsit.
Koper en verkopers van meer as vyf lewende hoenders, vir enige ander doel as regstreekse slagting by 'n geregistreerde slagplaas, moet die volgende voorwaardes nakom:
* Die verkopers van lewende hoenders, kommersiële boere inkluis, asook die handelaars wat die hoenders koop en verkoop, moet by die Bestuursagentskap vir Pluimveesiektes (in Engels bekend as die PDMA) registreer. Die agentskap, 'n onafhanklike organisasie, sal rekord hou van almal wat lewende hoenderskoop en verkoop en sal alle inligting vertroulik hou.
* Slegs geregistreerde kopers en verkopers sal toegelaat word om handel te dryf en dit is beide se verantwoordelikheid om toe te sien dat die ander party geregistreer is.
* Boere mag net lewende hoenders verkoop as 'n veearts of dieregesondheidstegnikus 'n sertifikaat uitgereik het dat dit gesond is.
* Handelaars mag net gesonde hoenders verkoop en moet voorgeskrewe rekords hou.
* Kopers en verkopers wat by die PDMA registreer, moet 'n onderneming teken dat hulle die vereiste beheermaatreëls sal nakom.
Die voorwaardes geld vir verkopers van onder meer lewende braaihoenders, lewende uitgediende lêhenne, lewende uitgediende teelhoenders, en jong lêhenne wat gereed is om eiers te begin lê (point of lay pullets).
Inenting teen die siekte
Zokwana het verder gesê daar is baie navrae oor die inenting van hoenders teen die siekte. “Ek is deur my span van kundiges geadviseer dat dit nie in die beste belang van beide die land en die produsente sal wees nie. Inenting van voëls sal 'n endemiese situasie skep, moniteringspogings beïnvloed en ons uitvoersertifisering raak.
“Al ons handelsvennote wil net produkte hê van 'n land wat vry van voëlgriep is en waar inenting nie gebruik word nie.”
Zokwana het 'n beroep gedoen op hoendereienaars, boere en die publiek om waaksaam te wees en alle voorvalle van hoë getalle sterftes onder hoenders en ander voëls by die naaste staatsveaarts aan te meld.
Navrae: Registrasievorms vir die verkoop en koop van lewende hoenders is beskikbaar by die webblaaie daff.gov.za en poultrydiseases.co.za. Die PDMA kan ook gekontak word by tel. 012 529 8298.
* Kyk ook dr. Mike Modisane se waarskuwing oor voëlgriep in die meegaande video.
https://youtu.be/1CkPvb3AQu8
