Volstruisboere en ander belangstellendes kan op 14 Maart die Wes-Kaapse departement van landbou (WKDL) se gratis volstruisinligtingsdag en –veiling by sy Oudtshoorn-navorsingsplaas bywoon. Sowat 100 broeivolstruise uit die departement se navorsingsprogram is te koop beskikbaar.
Die dag begin met die besigtiging van die die veilingvolstruise, waarna praatjies met onderwerpe soos makro-ekonomiese tendense en huidige tegnologiese ontwikkelings, ekonomiese tendense en geleenthede in die Klein Karoo en produksienorme en tendense in die volstruisbedryf volg.
Praktiese inligting oor die beste slagouderdom vir volstruise en die verbetering van velgehalte is ook op die lys van praatjies. Sprekers sluit in mnre. Wessel Lemmer, senior ekonoom by Absa Besigheidsbank, Willem Burger en FC Basson, albei van WKDL. Profs. Tertuis Brand en Schalk Cloete, en dre. Anel Engelbrecht en Zanell Brand sal ook hul kennis deel.
Skakel 044 203 9404 of 044 203 9420 vir meer inligting, en skakel mnr. PA Geldenhuys om reëlings rondom die besigtiging van die veilingvolstruise te tref op 082 410 7705.
Kyk gerus na die volledige program hier onder.
