’n Verbod is landwyd op die uitvoer van volstruise geplaas nadat 'n vorm van Avian Influenza op ’n plaas naby Oudtshoorn bevestig is.
’n Verbod is landwyd op die uitvoer van volstruise geplaas nadat 'n vorm van Avian Influenza op ’n plaas naby Oudtshoorn bevestig is.
Mnr. Anton Kruger, uitvoerende hoof van die Suid-Afrikaanse Volstruisbesigheidskamer (SAVBK), het aan Landbouweekblad gesê die H5N2-stam van die virus is op een plaas bevestig.
Dié spesifieke stam hou egter nie gevaar in vir mense nie en daar is geen rede tot paniek nie.
R108 miljoen en 5000 volstruise
’n Verbod is op die slagting en beweging van volstruise in die Oudtshoorngebied geplaas. Volstruisvleis dra 62% by tot die inkomste van die bedryf. So ’n verbod kan die bedryf R108 miljoen per maand kos.
Hoewel die saak in ’n ernstige lig beskou en fyn dopgehou word, kon vorige uitbrekings daarvan onderskeidelik sowat 7 en 17 jaar gelede by Oudtshoorn doeltreffend bestry word.
Ondersoeke word gedoen om presies vas te stel hoeveel voëls siek is. Altesaam 5 000 volstruise is op die spel.
Samewerking
Die SAVBK, die Departement van Landbou, Bosbou en Visserye en die Wes-Kaapse departement van landbou en landelike ontwikkeling werk saam om die situasie te hanteer.
In 2004/’05 het die land ’n verlies van R700 miljoen aan buitelandse inkomste gely en sowat 4 000 werksgeleenthede het verlore gegaan. In Junie 2006, toe voëlgriep op twee plase naby Albertinia gevind is, is ’n uitvoerverbod op vars volstruisvleis terugwerkend vanaf 1 Mei daardie jaar geplaas.
14 April 2011
