Weermodelle het verlede week aangedui dat die kans op reën oor die graanproduserende gebiede van die somerreënvalstreek, veral die sentrale en westelike dele, verbeter.
’n Goeie kans op reën bestaan ook vir die eerste deel van Februarie. “Die kans op reën in die tweede helfte van Februarie het sedert verlede week begin verbeter, nadat weermodelle verlede week aangedui het dat die kans op reën in dié tyd ondergemiddeld was,” sê Van den Berg.
Goeie reënval het oor die naweek oor groot dele van die land voorgekom, hoewel boere in die westelike somergraanproduksiegebiede steeds wag op reën. “In die sentrale en oostelike gebiede van Noordwes is daar dele wat goeie reënval gehad het die naweek,” sê mnr. Naudé Pienaar, assistent-hoofbestuurder van Agri Noordwes. “In die westelike dele van die provinsie, soos by Vryburg, Tosca, Wolmaransstad en Schweizer-Reneke, wag boere nog op reën en is die nood hoog.”
Mnr. Gys Olivier, ’n boer van Hertzogville in die Wes-Vrystaat, sê hulle hou, “maar net-net.” Die mielies wat in dié distrik ná reën aan die begin van die maand geplant kon word, is besig om te verskroei, terwyl sonneblomsaad op talle plase nie opgekom het nie.
Laatsomerreën
Intussen sê die Suid-Afrikaanse Weerdiens dat bogemiddelde reënval gedurende die laatsomer oor groot dele van die somerreënstreek verwag word.
Mnr. Hugh van Niekerk, streekbestuurder van die weerdiens in die Oos-Kaap, sê in sy seisoenale vooruitskatting vir die tydperk van Januarie tot Mei vir die provinsie in die vroegherfs kan dele van die suidoostelike kus naby Oos-Londen en die noordelike dele van die distrikte Joe Gqabi, Chris Hani en Sarah Baartman, asook die noordelike dele van die Wildekus bogemiddelde reënval ontvang. Vir die res van die provinsie word dan ondergemiddelde reënval verwag.
Bogemiddelde reën word weer einde April en begin Mei oor die hele Oos-Kaap verwag, met groter sekerheid oor die noordelike en westelike dele van die provinsie.
Van Niekerk benadruk egter dat die onsekerheid oor die uitwerking van die El Niño-stelsel, asook wanneer die stelsel sy hoogtepunt sal bereik, steeds onsekerheid ten opsigte van langtermynvoorspellings veroorsaak.
Hoë temperature
Van Niekerk sê na verwagting sal die kwik weer styg in die laatsomer en vroegherfs. “Daar is veral sekerheid dat bogemiddelde maksimum temperature oor die noordelike dele van die land in dié tydperk waargeneem sal word.”
Weermodelle dui tans aan dat dié bogemiddelde temperature tot in Mei kan voortduur.
Wat die bogemiddelde reënval betref, word groot hoeveelhede reën per reënvalgebeurtenis nie verwag nie. Voorspellings dui aan dat sowat 15 mm reën per dag vir ’n paar dae veral in die distrik Joe Gqabi, dele van die distrik Alfred Nzo en dele van die distrik Sarah Baartman kan voorkom.
“ ’n Mens moet egter in gedagte hou dat die Oos-Kaap ’n besonder droë tydperk beleef. Baie reën sal moet val om die opgaardamme op te vul en vir plantegroei om te herstel,” sê Van Niekerk.
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
