Mnr. Willem Basson (67), wat saam met sy broer, Paul, en hul seuns Coenraad, Coen, Henko en Paul, ’n gemengde boerdery op die plaas Uilenkraal bedryf het, was tot sy dood aktief in die boerdery.
Hy het Uilenkraal (Edms.) Bpk. se finansies hanteer en die voerfabriek bestuur.
Hy is Saterdagoggend in sy strandhuis op Langebaan oorlede.
Mnr. Coen Basson sê sy oom se dood is ’n groot skok vir die familie. “Vrydag het hy nog gewerk en normaal aangegaan. Dit was baie onverwags, hy het mos nie iets makeer nie, en was nie siek nie.”
Coen sal hom onthou as iemand wat altyd happy go lucky was, en nie bang was om ’n kans te waag om die onderneming te laat groei nie.
“As daar iets op die plaas gebeur het, het hy klaar ’n plan gehad om dit uit te sorteer. Hy het vinnig op sy voete gedink.”
Basson sê sy oom het altyd tyd gemaak vir sy medemens en vriende en geglo dat daar ’n balans tussen werk en ontspanning moet wees.
Die boerdery bedryf ’n Holstein-melkery, vleisbeeste en wolskape. Hulle plant koring, aartappels en mielies onder besproeiing vir kuilvoer.
Uilenkraal (Edms.) Bpk. besit en bedryf ook Nutrikor, ’n fabriek wat bees- en skaapvoer maak vir eie gebruik en om te verkoop.
Biogasaanvulling
Landbouweekblad het oor die jare gereeld oor die Bassons se vindingryke planne geskryf: Hoe hulle van die eerste melkboere in die Swartland was wat mieliekuilvoer gemaak het, eerder kompos as sand as beddegoed vir hul koeie gebruik het en in 2016 ’n biogasaanleg opgerig het nadat hulle Italië besoek het om boere daar die kuns af te vra.
Die biogasaanleg wat beesmis gebruik om metaangas te lewer, het toe in 95% van die boerdery se elektrisiteitsbehoeftes voorsien.
Basson laat sy vrou, Hannetjie, seun, Coenraad, dogters, Louann en Cecile, en ses kleinkinders agter.
Hy word op Vrydag 3 Februarie om 11:00 vanuit die NG kerk Darling begrawe.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
