Israel, wat weens skaars natuurlike hulpbronne genoodsaak was om suksesvolle metodes, tegnologie en produkte te ontwikkel, speel in April gasheer vir die negentiende Agritech-ekspo – ’n belangrike toonvenster vir internasionale landboutegnologie.
Die ekspo sal veral op ná-oespraktyke fokus. Israel word as wêreldleier in die veld van landboutegnologie beskou en Agritech, wat elke drie jaar plaasvind, bied ’n blik op dié fassinerende bedryf. Honderde voorbeelde van Israeliese ontwikkelings en tegnologie sal te sien wees. Dit sluit in kweekhuise, besproeiing, waterbestuur en suiwelboerdery.
“Israel se strewe om meer te produseer met minder hulpbronne het gelei tot ’n kleiner arbeidsmag, ons gebruik minder grond en meer as die helfte minder water, maar ons produseer drie tot vier keer meer kos. Hoe doen ons dit? Met tegnologie, natuurlik. Ons moet skep en innoveer om nuwe hulpbronne en tegnologie te ontwikkel,” het Gilad Peled van die land se uitvoer-instituut oor dié klein, waterarm landjie in die Midde-Ooste aan ’n groep internasionale joernaliste gesê.
Volgens Dani Meiri, algemene bestuurder van Agritech NPO, is daar verreikende ekonomiese en klimaatsveranderinge in die landboubedryf wat ’n invloed op gewasproduksie en die waarde van ’n oes het.
“Dit noodsaak ons om in na-oes-stelsels te belê. Die stelsels is nogal divers, en ons wil ’n platform skep om hierdie metodes en prosesse ten toon te stel. Ons gaan meer uitstallers hê wat in na-oes en voedselverwerking spesialiseer en ons bied ook ’n konferensie met internasionale sprekers en werkwinkels hieroor aan.
Agritech 2015 vind 28-30 April by die handelskou- en konvensiesentrum in Tel Aviv plaas. Vir meer inligting, besoek www.agritech.org.il
