Die gewildheid van die Vra vir Faffa-afdeling op Landbou.com is pas benadruk toe meer as 7 miljoen besoeke aan dié indeksblad aangeteken is.
Dit is ’n groot prestasie vir Landbouweekblad én vir dr. Faffa Malan, wat dié vraag-en-antwoord-afdeling sedert Januarie 2005 vir Landbou.com behartig. Malan is ’n bekende veearts en geniet hoë aansien onder boere en in die veebedryf. Die Landbouskrywers SA het hom in 2008 aangewys as die nasionale Landboukundige van die Jaar.
Malan is die skepper van die Famacha-stelsel, wat internasionaal erkenning geniet as dié metode om vas te stel of skape inwendige parasiete het. Dié stelsel is ontwikkel met die samewerking van die bekende veeartse prof. Gareth Bath en dr. Jan van Wyk.
Volgens Malan is die Vra vir Faffa-indeks van artikels die omvattendste bron van inligting oor vee- en dieresiektes in Suid-Afrika. Dit bevat meer as 2 000 artikels – almal geskep uit vrae van boere, en beantwoord deur kundiges.
Van dié inligting is ook in boekformaat beskikbaar. Verskeie boeke is reeds deur Landbouweekblad gepubliseer wat artikels bevat wat in die indeks verskyn het. Dié boeke is deur Malan opgestel.
Vra die veearts: Wat beesboere moet weet.
Ask the vet: What cattle farmers should know.
Vra die veearts: Wat kleinveeboere moet weet.
Vra die veearts: Die A-Z van honde en katte, deur dr. Sunelle Stydom en dr. Faffa Malan.
Dié boeke (en vele meer) is almal te koop en kan op Landbou.com se aanlyn-winkel bestel word.
* Besoek die Vra vir Faffa-indeks hier en bekyk die verskillende afdelings en artikels daarin.
*** Nota van dr. Faffa Malan: Dankie aan al die medewerkers (baie) wat bereid was (en nog is)om hulle kennis aan boere mee te deel sonder vergoeding. Dankie aan Landbouweekblad en Landbou.com wat hierdie platform, gratis aan die boere, geskep het. My versoek aan die boere en voornemende boere is dat hulle hul dank aan LBW sal oordra deur kommentaar oor hierdie diens hieronder te lewer. In besonder aan Jan Bezuidenhout wat help om hierdie diens te bedryf.
