Agri-Expo, die organisasie vir die bevordering en bemarking van die landbou wat sy wortels in die oudste landbougenootskap in Suid-Afrika het, wou nie gerugte oor afleggings by die organisasie ontken of erken nie.
Landbouweekblad het uit verskeie oorde verneem dat die meeste van die personeel afleggingsbriewe ontvang het.
Me. Isabeau Botha, korporatiewe kommunikasiebestuurder, het Landbouweekblad se navrae in dié verband na mnr. Pieter van Wyk, die organisasie se president, verwys.
Van Wyk wou nie uitwei oor die gerugte nie. “Ons is besig met ’n proses, maar dis gevoelig. Daarom kan ek op die stadium regtig niks sê nie.”
Hy het onderneem om oor ’n “week of drie” ’n amptelike verklaring uit te reik.
Volgens die organisasie se amptelike webwerf is daar 17 personeellede. Die direksie bestaan uit 12 lede.
Die organisasie het verlede jaar sy 190ste bestaansjaar as die Kaap die Goeie Hoop-landbougenootskap gevier, asook die 25ste bestaansjaar as Agri-Expo.
Die organisasie bied onder meer die jaarlikse SA Kaasfees en SA suiwelkampioenskap aan.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
