‘n 60 jarige boervrou van Limpopo is Sondag (19 September) tydens ‘n plaasaanval deur drie mans verkrag, sê Agri Limpopo.
Mnr. Francois van den Berg, voorsitter, sê die 70 jarige boer en sy vrou is rondom 09:00 die oggend in hul huis op hulle plaas in die Baltimore-distrik aangeval.
“Die boer en sy vrou was in en uit die huis toe die aanvallers toegeslaan het. Niks is gebreek om in die huis in te kom nie,” vertel Van den Berg.
Vermeende aanvallers aangekeer
Die boer is aangerand en aan ‘n toilet vasgebind. “Daarna het die drie mans die vrou aangerand en almal van hulle het haar verkrag,” sê Van den Berg.
Die aanvallers het kontant en klere gesteel waarna hulle op die vlug geslaan het. Die boer kon daarin slaag om homself los te wikkel en hy het die gemeenskap se boerewag gemobiliseer. Die drie mans is ure later opgespoor en deur die boere aangekeer.
“Die mans, wat van die Stylloop-gebied afkomstig is, het klaar die kontant en klere onder mekaar verdeel toe die boere op hulle afgekom het. Hulle is deur die boere aan die Polisie oorhandig, wat later eers op die toneel opgedaag het,” vertel Van den Berg.
Barbaarse optrede
Van den Berg beskryf die gebeure as barbaars. “ Dit is absolute barbaarse optrede. Hoekom is dit nodig om só iets te doen as jy net goed gaan steel? Dit maak ons bekommerd want dit lyk of dit al hoe erger word. Dit is ook net ‘n duidelik teken dat boere hulleself moet mobiliseer en hulself moet beveilig.”
Volgens Van den Berg is dit die agtste plaasaanval wat die afgelope paar maande in dié provinsie voorgekom het.
20 September 2010
