‘n Vrou is Woensdagaand (1 September) op ‘n kleinhoewe in Mpumalanga vermoor nadat sy reeds twee keer tevore aangeval is.
Luidens ‘n berig op Beeld se webwerf het me. Elizabeth Dorey geweier om van die kleinhoewe weg te trek aangesien haar ouers se as op die grond gestrooi is.
Dit was die derde keer in sewe jaar wat sy op die Hilltop-kleinhoewe aangeval is. Die vorige aanval het op 25 Desember 2007 plaasgevind.
Erg aangerand
Kol. Gerrie Agenbag, wat ook Dorey se vorige sake ondersoek, sê sy was klein gebou en is erg aangerand voordat sy vermoor is. Dorey se liggaam is in die gang gevind. Haar hande was agter haar rug vasgebind, ‘n stuk lap was in haar mond en sy is na bewering met ‘n elektrise koord gewurg.
Die aanvallers het vermoedelik toegang tot die bouvallige huis gekry deur ‘n venster by die voorstoep te breek. Hulle het die res van die ruit uit die vensterraam gehaal.
‘n Werker het die bure ontbied nadat hy Donderdagoggend vroeg vir werk aangemeld het en die stukkende venster gesien het.
Enige inligting oor die voorval kan by Agenbag vermeld word op 013 759 1108.
3 September 2010
