Twee mans is aangekeer vir die moord op ‘n bejaarde vrou van die plaas Thee-rivier buite Citrusdal, sê die SA Polisiediens.
Luidens ‘n berig in Die Burger is die 75 jarige me. Henna Smit vermoedelik Donderdagnag, 26 April 2012, verwurg.
Smit se seun, mnr. Isak Smit, het op haar liggaam afgekom. Hy het haar sowat 21:00 die aand laas gesien. Hy woon ook op die plaas, sowat 30m van sy ma se huis af. Hy het omstreeks 01:00 wakker geword omdat die honde geblaf het.
Smit het gaan ondersoek instel en op sy ma se liggaam afgekom. Haar hande was agter haar rug vasgebind. Sy is na bewering buite die huis oorval.
Lt.kol. Cisce Coetzee sê leidrade wat binne die huis gevind is, het die Polisie Vrydagmiddag, 27 April 2012, na twee verdagtes gelei. Die verdagtes, 22 en 34 jaar oud, is volgens Coetzee bekend op die dorp. Hulle verskyn Maandag, 30 April, in die plaaslike landdroshof op aanklagte van moord.
Bron: Die Burger
30 April 2012
