Die vryemarkstelsel (wat reeds 250 jaar lank bestaan) is die beste manier is om welvaart te skep. Daarteenoor is kapitalisme een van die swakste stelsels om welvaart tussen ryk en arm te verdeel, sê prof. Piet Naudé, direkteur van die Nelson Mandela Metropolitaanse Universiteit se sakeskool.
Naudé het gesê die wêreldwye ekonomiese resessie het die vrye mark ’n knou toegedien. Nie weens die groot geld wat in ekonomieë ingepomp is om ’n ekonomiese katastrofe af te weer nie, maar omdat mense vertroue in instellings, soos banke, verloor het.
Met verwysing hoe een geslag se besluite die volgende geslag se lewe beïnvloed, het hy verwys na die koms van die ploeg in 1360 in Europa wat die landbourevolusie ingelei het.
“Wat egter nie destyds besef was nie, is dat dit ook die gewelddadige interaksie tussen die mens en die natuur ingelei het. Toe die eerste rolpers sy verskyning gemaak het, is daar nie besef hoeveel plantasies nodig sou wees om die drukkersbedryf in stand te hou nie. Dit geld ook die eerste stoomenjin en nou die koms van die digitale kapitalisme en globalisering.”
Hy is bekommerd dat die wêreld baie laat wakker geskrik het om te besef dat daar nie onbeperkte groei kan wees in ’n beperkte omgewing nie.
“Selfs tot vandag is daar nog geen afdwingbare kontrak om die verwoestende uitwerking wat die mens op die natuur het, te keer nie. Die verantwoordelikheid en uitdaging van die huidige geslag is om stelsels in werking te stel wat ekonomies volhoubaar, maatskaplik aanvaarbaar en ekologies vriendelik sal wees.
31 Augustus 2010
