Vyf verdagtes tussen die ouderdom van 19 en 25 jaar het in die hof verskyn ná hulle inhegtenisneming binne enkele dae ná die voorvalle.
In die geval van die die 68-jarige mev. Martie Bester, wie se verbrande lyk op die plaas Elfbloem in die distrik Theunissen aangetref is, word twee inwoners van die dorp aangehou. Die polisie het ook eiendom wat op die plaas gebuit is, gevind.
Inligting van die gemeenskap het ook gelei tot die spoedige inhegtenisneming van drie mans ná die skietdood van mnr. Toon Swanepoel en sy vrou, Rienie, in die Bainsvlei-gebied, wes van Bloemfontein.
Lt.-genl. Simon Mpempe, Vrystaatse polisiekommissaris, het die plaasgemeenskap geloof vir die samewerking met sy lede tydens die ondersoek.
Mnr. Tommie Esterhuyse, voorsitter van Vrystaat Landbou se komitee vir wet en orde, sê egter die polisie moet meer doen om landelike veiligheid te verseker. Hy sê die plaasgemeenskap moet beskerm word omdat hulle sagte teikens is.
Esterhuyse het hom op landbougemeenskappe beroep om hulself te beveilig en meer paraat te wees om voedselsekerheid te verseker.
“Die polisie moet eerder pro-aktief optree deur sy sigbare polisiëring in landelike gebiede te verbeter.” Esterhuyse het ook sy kommer uitgespreek dat veiligheidsoptrede deur boere kan aanleiding gee dat hulle reg en geregtigheid in eie hande neem. “In baie gevalle moet die boere patrollies eiehandig onderneem, omdat die polisie nie beskikbaar is om hulle te vergesel nie,” sê hy.
Mnr. Henk Vermeulen, hoofbestuurder van Vrystaat Landbou, sê landelike veiligheid is ’n probleem wat jaarliks ’n al hoe groter uitdaging stel. “Hierdie uitdaging moet al hoe meer op nuwe maniere en vanuit ander hoeke benader word.”
Vermeulen sê VL se landelike veiligheidsplan berus op pro- en re-aktiewe optrede van sy ledestrukture. “Dit beteken dat mense in die landelike gebiede betrokke moet raak. Ons repekteer mense se keuse indien hulle verkies om nie aan VL se strukture deel te neem nie.” sê hy.
