Vyf mans het Sondagoggend (26 Februarie) ‘n boervrou en haar huishulp aangeval, aldus die SAPS.
Kapt. Ernest Sigobe, woordvoerder, sê die voorval het omstreeks 08:55 op ‘n plaas naby King Williams Town in die Oos-Kaap plaasvind.
Die mans het toegang tot huis verkry, waar hulle die 45-jarige vrou en haar huishulp aangerand en vasgebind het. Sigobe sê die mans het die vroue met messe en vuurwapens aangehou en geld geëis.
Vuurwapens
Die boervrou het aangedui dat sy nie geld in die huis het nie, waarna die mans die kluis oopgebreek en vuurwapens gesteel het. “Twee selfone en ander kleiner items is gesteel waarna die groep met die vrou se bakkie op die vlug geslaan het.”
Die voertuig is later op die R65 naby Bhisho gevind, en Sigobe sê ‘n grootskaalse soektog is onderneem om die mans te vind.
Intussen is die verdagtes wat ‘n boer van Potchefstroom vermoor het, steeds soek. Die Polisie is opsoek na ‘n groep van vyf mans wat mnr. David Hall Maandag (13 Februarie 2012) doodgeskiet en sy vrou Bernadette, aangeval het.
27 Februarie 2012
