Wolboere is gewaarsku om nie superfynwol ten koste van die hoeveelheid wol wat per skaap geskeer word, na te jaag nie. Dit is die eerste keer in meer as 20 jaar dat dié vermaning uitgereik is.
Mnr. Geoff Kingwill, voorsitter van Cape Wools, het op die nasionale NWKV-kongres gesê omdat wolboere op markseine gereageer het, oorskry die aanbod van superfynwol tans die vraag. Dit het reeds daartoe gelei dat die prysgaping tussen fyn- en mediumwol merkbaar gekrimp het. “Hoewel fynwol steeds ’n premie geniet, sal dit nie so groot wees soos in die verlede nie. Dit blyk ook dat die produksie van mediumwol afneem.”
Hy meen die verwagte versnelling van die wêreldekonomie, veral in Amerika en Europa, sal meebring dat die vraag na wolklere gaan styg. “As na die prysvergelyking tussen wol en katoen en wol en mensgemaakte vesels gekyk word, het dit van 3:1 in die middel 1990’s tot 5:1 toegeneem. Om dit te handhaaf en as aansporing te dien om met wolproduksie te volhard, sal wolpromosie nie agterweë gelaat moet word nie.”
Die kongres het eenparig goedgekeur dat wolkopers in die komende seisoen 12 sent per kilogram wol van produsente vir die bevordering van wol invorder. Nagenoeg R1,3 miljoen sal vir die plaaslike bevordering aangewend word en R4,9 miljoen vir internasionale bevordering. Sowat R2,6 miljoen sal in reserwe gehou word.
