‘n Agterstand van sowat 800 000 wapenlisensies moet nog deur die Polisie verwerk word, sê die Vryheidsfront Plus.
Luidens ‘n verklaring het dié syfer duidelik geword na aanleiding van syfers wat mnr. Nathi Mthethwa, Minister van Polisie, in antwoord op ‘n vraag in die Parlement gegee het.
Mnr. Pieter Groenewald, die party se veiligheidswoordvoerder, sê Mthethwa het bevestig dat 1 365 203 aansoeke vir hernuwings ingevolge die nuwe Wet op Beheer van Vuurwapens ontvang is. Van dié aansoeke is 499 043 goedgekeur, 15 766 afgekeur en 2 009 op appèl geneem.
“Hierdie syfers bevestig dat die agterstand van die verwerking van aansoeke by die Polisie meer as 800 000 is,” sê Groenewald.
Wat van die nege maande?
Volgens Groenewald kan die onderneming deur die Minister, dat die agterstand van vuurwapenlisensies binne nege maande uitgesorteer sal wees, nie haalbaar wees nie.
Mthethwa het vroeër die maand, 2 November 2010, saam met genl. Bheki Cele tydens ‘n perskonferensie belowe dat probleme rondom wapenlisensies en die sloering met uitreiking daarvan uitgesorteer sal word.
Luidens ‘n nuusverklaring het Mthethwa gesê: “Ons het ‘n omdraaitydperk van nege maande in plek geplaas om agterstande op te klaar”. Volgens hom word ernstige probleme met die sentrale vuurwapen register ondervind. Hy’t ook uitgewys dat hulle vermoed dat elemente van korrupsie betrokke is.
Vier miljoen wapens
“Wat verder kommerwekkend is, is dat daar ongeveer vier miljoen vuurwapens in die land is en slegs 1,3 miljoen aansoeke vir herlisensiëring is ontvang. Meer as 2,7 miljoen vuurwapens is dus nog op die ou stelsel voor die nuwe wet,” verduidelik Groenewald.
Hy sê die feit bevestig en versterk die party se vroeëre voorstel aan Mtetwa dat alle ou lisensies geldig moet bly, en die lisensiëring van vuurwapens wat ná die instelling van dié wet aangekoop word, volgens die wet se spesifikasies moet plaasvind.
26 November 2010
