Volgens adv. Anton Alberts, die Vryheidsfront Plus se parlementêre woordvoerder oor water en sanitasie, het die “onlangse watertekorte by Rand Water in Gauteng opnuut bewys hoe allerbelangrik water vir die land se normale voortbestaan is”.
Hy het ’n geskrewe parlementêre vraag oor die kwessie aan me. Nomvula Mokonyane, Minister van Waterwese en Sanitasie, gerig waarin hy versoek het dat sy oorweeg om die land se wateraanlegte as nasionale sleutelpunte te laat verklaar om sekuriteit te verbeter.
In haar antwoord sê Mokonyane dat die besluit by die Minister van Verdediging lê en dat ’n jaarlikse risiko-analise by al die aanlegte gedoen word om beveiliging te verbeter. Sy sê ook dat infrastruktuur soos pypleidings regoor die land die meeste blootgestel is, maar dat waterrade baie doen om dit te beskerm en beveilig.
“Indien daar regtig ’n probleem by een van die groot aanlegte kom, kan dit die land in ’n krisis dompel. Tog beskou die staat die President se omstrede huis as ’n veel belangriker nasionale bate en prioriteit om beskerm te word. Dit sal moet verander,” sê Alberts in ’n mediaverklaring. “Die balans tussen beskikbaarheid en voorsiening is fyn gekalibreer en die geringste probleem kan groot ontberings veroorsaak.
