’n Interministeriële taakspan word op die been gebring om te verseker dat voldoen word aan die waterbeperkings wat in die Wes-Kaap ingestel is.
Waterbeperkings is tans 20% vir huishoudelike en industriële gebruik en 30% vir besproeiing. Hierdie beperkings sal van krag bly totdat die damvlakke weer 85% bereik het.
Groot afname
Mnr. Sputnik Ratau, woordvoerder van die Departement van Water en Sanitasie, sê die gemiddelde damvlakke in die provinsie is op Maandag 8 Mei op 21,7% gemeet. Dit is ’n afname van 10% teenoor die ooreenstemmende tyd verlede jaar toe die damme 31,7% vol was.
Die Theewaterskloofdam, die grootste dam in die provinsie se waterverskaffingstelsel, is slegs 15,59% vol. In die ooreenstemmende tyd verlede jaar was dit 32,17% vol. Ratau sê water word van ander damme in die stelsel daarheen oorgedra.
Sedert 18 April kry boere langs die Berg-, Riviersonderend- en Eersterivier en diegene wat waterregstreeks van die Theewaterskloofdam gekry het, nie meer water vir besproeiingsdoeleindes nie. Hierdie boere se toekenning uit die stelsel vir die somer is sedert 1 Junie 2016 m 20% ingekort. Die perk is voor einde April bereik.
Ingrypings
Ander ingrypings om die watertekort weens die droogtetoestande die hoof te bied is onder meer die onttrekking van water uit verskeie bronne in die Wes-Kaap, die skoonmaak van die twee kanale in die Voëlvlei- en die Theewaterskloofdam en die installering van 16 pompe in die Bergrivier.
Die Parlement se portefeuljekomitee vir water en sanitasie is ingelig dat die Departement van Water en Sanitasie vandeesmaand nog ’n waterindaba sal hou om aan ’n ingrypingsplan vir die nabye toekoms te werk.
