Landbouverwante partye se regstryd oor die interpretasie van artikel 25 (1) en (2) van die Nasionale Waterwet (Wet 36 van 1998) het begin ná ’n omsendbrief deur die departement van water en sanitasie in Januarie 2018 waarvolgens die staat nie meer oordragte van waterregte tussen persone sou goedkeur nie.
Die eenparige uitspraak deur die nege regters van die Grondwethof, geskryf deur regter Russel Madlanga, is met groot verligting ontvang. Aanvanklik het die hooggeregshof in Pretoria in die guns van die staat bevind dat waterregte nie oorgedra en verhandel mag word nie, waarop die landbouverwante partye geappelleer het.
Die appèlhof het bevind dat dit wél oorgedra en verhandel mag word, waarop die staat na die Grondwethof geappelleer het. Madlanga het ’n interessante nawoord tot sy uitspraak geskryf. Hierin spreek hy sy begrip uit vir die staat se frustrasie met die skynbare gebrek aan transformasie in die watersektor.
