Dit is deesdae so te sê normaal om 'n waterkrisis in Suid-Afrika te hê vanweë 'n watertekort wat net nie ophou nie.
Die land sal anders oor water moet begin dink, het me. Susan Viljoen van die WWF-Mondi Water Stewardship Partnership in Hilton, op die tiende SA Grootkuddekonferensie by die Champagne Sport-oord in die KwaZulu-Natalse Drakensberg gesê.
Dalk was die afgelope droogte, waaronder die Wes- en Noord-Kaap steeds gebuk gaan, die wakkerwordgebeurtenis wat Suid-Afrika nodig gehad het.
In groot dele van die land waar baie reën geval het, is die situasie beter, maar dit kan nog 'n paar seisoene neem voordat alles heeltemal reg is. Intussen ondervind die Wes-Kaap nog 'n krisistyd weens min of geen reën en leë damme.
Suid-Afrika worstel met drie groot waterriosiko’s, naamlik genoeg water op die regte tyd, teen die regte gehalte en teen die regte prys.
Stukrag word daaraan verleen deur verdere onsekerhede, waaronder reënval, aanvraag, befondsing en doeltreffende beheer.
“As dinge aangaan soos nou, sal die land teen 2030 sowat 17% te min water hê. Weens die ontstellende vlak van korrupsie en swak funksionering van die regering, kan ons nie op die regering staatmaak om die waterkrisis op te los nie," sê Viljoen.
"Daarvoor is watersekerheid té belangrik. Watersekerheid en rentmeesterskap is 'n gesamentlike verantwoordelikheid wat samewerking en betrokkenheid van alle sektore verg,” het Viljoen gesê.
