Die Departement van Waterwese het slegs ‘n derde van die nodige reguleringspersoneel wat dit benodig, sê me. Edna Molewa, die nuwe Minister van Waterwese en Omgewingsake.
Luidens ‘n berig op News24.com het Molewa in ‘n skriftelike antwoord op ‘n vraag in die Parlement gesê dié departement het slegs 31 voltydse beamptes wat met die implementering en monitoring van water en waterwette gemoeid is.
Volgens die departement se jongste Groen Druppel-verslag voldoen slegs 7% van die meer as 800 munisipaliteite in die land se rioolwerke tans aan die aanvaarde standaarde.
Regstreekse verband
Intussen sê mnr. Louis Meintjes, voorsitter van die Nasionale Waterforum, hy meen ‘n regstreekse verband bestaan tussen die tekort aan personeel by die departement en die besoedelingsprobleme wat tans die land teister.
“Dit lyk asof die gehalte van die water die afgelope paar jaar afgeneem het soos die vermoë van die departement minder geword het. En hierdie watersituasie het nie onlangs onstaan nie. Die waarskuwings is al jare lank daar,” verduidelik Meintjes.
Bron: News24.com
26 November 2010
