VAN WANNEER AF?
Begin voer wanneer diere wat in ’n matige kondisie was, sowat een kondisiepunt gewig verloor het. Diere wat ’n gewigsverlies van meer as 30% het, het ’n swakker eetlus en weier soms om te vreet.
VOERSOORTE:
Wat beskikbaar is, sal grootliks bepaal wat gevoer word. Die relatiewe voedingswaarde en koste per voedingseenheid moet vergelyk word.
WATTER DIERE?
Koeie en ooie wat swaar dragtig is of reeds gekalf of gelam het, is die gevoeligste vir swak voedingstoestande.
Ondervoede dragtige beeste en skape is blootgestel aan ketose en domsiekte. Hulle sal swak kalwers of lammers in die lewe bring en te min melk hê. Die produksie- en reproduksievermoë van jong verse en ooitjies kan permanent gestrem word as hulle ernstige voedseltekorte ervaar. Dit is dus belangrik dat hulle gevoer word.
Die voedingsbehoeftes van sulke jong diere is relatief laag en hulle word goedkoper as volwasse diere deur ’n droogte gehaal.
Volwasse droë diere herstel volkome ná ’n droogte. ’n Tydperk van lae voedingstofinname benadeel hul produksievermoë nie permanent nie. Verkoop ou en minderwaardige diere dadelik.
HOE?
¦Maak seker elke dier kry sy regmatige deel. Met beperkte voiding verdruk die sterker diere die swakkes.
¦Pas diere aan by die rantsoen.
¦Verskaf genoeg vreetspasie – sowat 20 cm kriplengte per bees en 10 cm kriplengte per skaap – sodat almal gelyktydig kan vreet. Indien onmoontlik, kan sout in die mengsels help dat diere wat eerste vreet, hulle nie oorvreet nie.
¦ Bepaal die korrekte frekwensie van voeding. Die doel van droogtevoeding is om al die diere aan die lewe te hou en nie om sommige vet te maak en ander te laat vrek nie. Dié doel word in ’n groter mate bereik by diere wat drie keer weekliks gevoer word as met daaglikse voeding. Jy spaar ook só op arbeid- en vervoerkoste.
¦ Diere wat swaar dragtig is of kort gelede gekalf of gelam het, moet verkieslik hul rantsoene daagliks ontvang.
¦ Skei swak en sterk diere; dit verminder mededinging.
¦ Beperk kampgroottes. Diere se energiebehoefte kan met tot 40% verlaag word deur hul beweegruimte te verminder.
VROEË SPEEN:
Kalwers en lammers kan, met voldoende aanvullende voeding, gespeen word wanneer hulle onder skeidelik vyf maande en tien weke oud is. Die koeie of ooie kan dan as droë volwasse diere gevoer word, wat ’n aansienlike besparing kan meebring.
Navrae: E-pos: FerreiraV@tsb.co.za
