Wildbedryf SA en die Regering het planne om Suid-Afrika se wildsvleisproduksie binne 20 jaar tot 250 000 ton op te stoot, het mnr. Norman Adami, eienaar van Nyumbu Game naby Brits, op ’n inligtingsdag van die veilingshuis Wildswinkel op Stellenbosch gesê.
Wildsvleis is ’n unieke produk wat natuurlik en organies is met minder kilojoules en cholesterol as ander rooivleis. Daarom het die bedryf sulke enorme groeipotensiaal, het hy gesê.
As die nasionale wildsvleisproduksie 250 000 ton kan haal, sal die bedryf teen ’n karkaswaarde van R35/kg sowat R7 miljard sterk wees.
Bedryf is onderontwikkel
“Die bedryf is onderontwikkel, maar daar is ’n groot plaaslike en internasionale vraag na wildsvleis. Ek reken daar is ’n sluimerende vraag na omtrent 750 000 ton wildsvleis wêreldwyd. Dis enorm. Nieu-Seeland lewer op die oomblik die meeste wildsvleis – sowat 50 000 ton per jaar. Suid-Afrika lewer maar sowat 18 500 ton.
“Die geleenthede is dus groot. Dit is een van die min bedrywe wat deur aanbod, eerder as vraag, beperk word.”
Adami sê ander produkte, soos meubels, skoene en kuriositeite, kan verdere waarde toevoeg en vaardighede help ontwikkel. Die dalende getalle en toenemende skaarsheid van wild in die res van Afrika bring ook geleenthede vir Suid-Afrika om trofeejag uit te brei.
Buitelandse valuta
“Die mark is nie net tot Europa en Amerika beperk nie, maar Asië hou ook geleenthede in. Dit bring betekenisvolle buitelandse valuta in. Selfs al het jy gewone diere wat jy laat jag, sal tipies 5% van jou diere spesiaal wees en ’n premie kan verdien.”
Die plaaslike jagmark moet daarom nie onderskat word nie, sê Adami.
