Volgens die Verenigde Nasies se Voedsel-en-landbou-organisasie (VLO) se nuutste indeks van voedselpryse het wêreldwye voedselpryse in Desember met 1,9% vergeleke met November verlede jaar gedaal.
Die indeks het in Desember ’n gemiddeld van 132,4 punte bereik, 1% laer as ’n jaar tevore. In 2022 as geheel het die indeks ’n gemiddeld van 143,7 punte bereik, 14,3% hoër as die gemiddeld in 2021. Volgens die VLO het dit, tesame met groot prysstygings in 2021, gelei tot aansienlike druk op voedselsekerheid vir laerinkomstelande waar voedsel ingevoer moet word.
Die indeks dui ook aan dat veral die pryse van koring en mielies verlede jaar rekordhoogtes bereik het. Die gemiddelde waarde van die VLO se indeks vir groente-oliepryse het ’n rekordvlak bereik, terwyl die indeks vir suiwel- en vleispryse hul hoogste vlakke sedert 1990 bereik het.
Mnr. Maximo Torero, hoofekonoom van die VLO, sê kalmer voedselkommoditeitspryse is ná twee wisselvallige jare welkom.
“Dit is belangrik om waaksaam te bly en aan te hou konsentreer op die verligting van wêreldwye voedselonsekerheid aangesien wêreldwye voedselpryse steeds op verhoogde vlakke is met baie stapelvoedsel se pryse wat naby aan rekordhoogtes is en die prys van rys wat toeneem. Daar is ook verskeie risiko’s verbonde aan toekomstige voorrade.”
Die pryse van veral groente-olies het sedert November verlede jaar afgeneem en die laagste vlak sedert Februarie 2021 bereik. Internasionale pryse van palm-, soja-, raapsaad- en sonneblomsaad-olies het almal in Desember afgeneem. Dit is aangedryf deur laer wêreldwye invoervraag, die moontlikheid dat sojaboonproduksie in Suid-Amerika sal styg en ’n afname in ruoliepryse.
Só lyk die onderskeie indekse
Die VLO se indeks vir graanpryse het sedert November met 1,9% gedaal. Goeie oeste in die Suidelike Halfrond het koring se uitvoervoorrade ’n hupstoot gegee, terwyl sterk mededinging van Brasilië ’n demper op wêreldwye mieliepryse geplaas het. Internasionale ryspryse het egter gestyg danksy goeie vraag in Asië en die versterking van uitvoerlande se wisselkoerse teenoor die dollar.
Die indeks vir vleispryse het in Desember met 1,2% vergeleke met November gedaal, met laer pryse vir bees- en hoendervleis wat meer gewig gedra het as hoër pryse vir vark- en skaapvleis. Internasionale beesvleispryse het gely onder swak globale vraag vir mediumtermynvoorrade, terwyl goeie uitvoer ’n demper op hoendervleispryse geplaas het. Varkvleispryse het danksy sterk vraag gedurende die vakansietyd gestyg, veral in Europa.
Die indeks vir suiwelpryse het met 1,2% in Desember gestyg nadat dit vir vyf agtereenvolgende maande gedaal het. Hoër internasionale kaaspryse het die styging aangedryf. Internasionale pryse vir botter en melkpoeier het egter afgeneem.
Die indeks vir suikerpryse het gestyg met 2,4% sedert November, veral weens die impak van ongunstige weer op opbrengste in Indië en vertragings met die verwerking van suikerriet in Thailand en Australië.
Plaaslik
Volgens die Pietermaritzburg-groep vir ekonomiese geregtigheid en waardigheid se huishoudelike bekostigbaarheidsindeks vir Desember 2022, wat voedselprysdata van 44 supermarkte en 30 slaghuise in Johannesburg, Durban, Kaapstad, Pietermaritzburg en Springbok volg, het ’n gemiddelde kosmandjie in Desember R4 853,18 gekos, wat R13,5% hoër is as ’n jaar gelede, en 0,4% hoër is as in November 2022.
Die koste vir ’n kosmandjie het van November tot Desember 2022 egter afgeneem in Johannesburg, Springbok en Pietermaritzburg, terwyl pryse in Durban en Kaapstad gestyg het.
Die groep het bevind dat die pryse vir onder meer bevrore hoenderstukke, uie, tamaties, spinasie, lemoene, appels, tee en blikkiesvis met meer as 4% toegeneem het, terwyl die pryse vir koekmeel, suikerbone, stampmielies, aartappels, volroommelk, beesvleis, beeslewer, hoenderlewer, piesangs, cremora en polonie met 2% of meer toegeneem het.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
