Voorbereidende werk om die wal van die Clanwilliam-dam te verhoog is byna afgehandel en bouwerk aan die wal self sal tussen September vanjaar en Januarie 2017 begin.
Mnr. Sputnik Ratau, woordvoerder van die Die Departement van Water en Sanitasie, sê die departement se eie bouspanne het die voorbereiding gedoen, maar ’n kontrakteur van buite word aangestel om die bouwerk te doen. “Dié proses is nog aan die gang.”
Van die werk wat reeds afgehandel is, is ’n suiweringsaanleg en werkswinkels wat voltooi is, toegangspaaie is geteer en 66 eiendomme, wat deur die verhoogde damvlak geraak sal word, is onteien.
Verhoog wal met 13 meter
Die mikpunt is om die wal met 13 meter te verhoog om ’n bykomende 70 miljoen kubieke meter water in die dam te hou. “Dit sal nie net oor die langtermyn meer betroubare watervoorsiening verseker weens die groter inhoudsmaat nie, maar is ook van deurslaggewende belang vir ontwikkelende boere en bestaande kommersiële boere”.
Me. Jeanne Boshoff, kommunikasiebestuurder van Agri Wes-Kaap, sê die departement het onlangs ’n aanbieding oor die werk aan die dam op Vredendal gedoen. “Boere in die omgewing is positief en gerus oor die proses tot dusver.”
Die projek sal na raming sowat R2,2 miljard kos.
* In Januarie 2015 was sowat 300 besproeiingsboere onder die dam sowat drie weke sonder water nadat 'n kanaal uit die dam gebreek het. Die Wes-Kaapse regering hetingespring om die boere te help, deur R1 miljoen beskikbaar te stel.
