‘n Plaasvoorman is as ‘n held beskryf nadat hy glo geweier het om sy werkgewer se huissleutels vir aanvallers te gee.
Luidens ‘n berig op Nuus24.com het die aanvallers die 39-jarige mnr. Samuel Chaba en sy 37-jarige vrou, Maria, onderskeidelik in die hand en been geskiet.
Die voorval het Maandagnag (10 Oktober 2011) in die Oos-Vrystaat plaasgevind. Die egpaar is kort voor middernag deur vier mans met klapmusse in hulle huis op die plaas Grootverwulf aangeval. Chaba het wakker geword toe die groep die huis se voordeur oopgebreek het.
Die groep het aangedring daarop dat Chaba die sleutel van die hoofhuis, waar me. Marianne Conlyn – ‘n bekende in Suid-Afrika se perdekringe – geslaap het, vir hulle moet gee. Hy het geweier om dit, asook selfone aan die rowers te gee, en hulle het hom na bewering in die hand geskiet. Sy vrou het daarna die kamer binnegekom en is glo summier in die kuit geskiet.
Ontvlug van aanvallers
Chaba is toe vasgebind en na die hek van die hoofhuis gebring, waar hy gedwing is om dit oop te maak. Hy kon daarin slaag om van die aanvallers te ontvlug, weg te kruip en vir Conlyn te bel.
Sy het die ligte van die hoofhuis aangeskakel, en die honde het begin blaf. Die aanvallers het toe glo op die vlug geslaan. Conlyn het ‘n vriend gebel, wat die bure en die polisie ontbied het. “Ek het nog nooit sulke omgee beleef nie.”
Volgens Conlyn het byna al die boere in die omliggende omgewing hulle na die plaas gehaas om te help en sommige is die berg in om na die aanvallers te soek. Die groep het glo oor die Lesotho-grens gevlug. Die aanvallers het vermoedelik die huis voor die aanval dopgehou.
Chaba en sy vrou is in ‘n hospitaal op Bethlehem behandel. Sake van poging tot moord word ondersoek.
Bron: Nuus24.com
12 Oktober 2011
