Dit kom nadat die huidige landbouminister, mnr. Gerrit van Rensburg, hom van die DA se kandidatelys vir die komende verkiesing onttrek het.
Sy woordvoerder, mnr. Wouter Kriel, sê Van Rensburg was op die lys, maar nadat hy die saak goed deurdink het, het hy besluit om hom te onttrek.
Maar hy sal nie vir die landbou verlore wees nie. Besonderhede oor hoe Van Rensburg die landbou in die toekoms gaan dien, word nog stil gehou.
Onder Van Rensburg is die Wes-Kaapse departement van landbou al verskeie kere deur die Suid-Afrikaanse Instituut vir Regeringsouditeure (SAIGA) as die beste regeringsdepartement in die land aangewys.
Sukses
Van Rensburg is ook ’n voorstaander vir die nasionale uitbou van die plaaswerker van die jaar-kompetisie, wat reeds sedert 2002 in die Wes-Kaap suksesvolle erkenning gee aan die belangrike rol van plaaswerkers in die land se ekonomie en in die gemeenskap.
In landboukringe word reeds bespiegel oor wie die volgende moontlike provinsiale minister van landbou sal wees. Van die name wat genoem word as moontlike kandidate, is mnr. Basil David Kivedo. Hy is sesde op die provinsiale kandidatelys en tans die uitvoerende burgemeester van die Breedevallei-munisipaliteit. Hy was ’n prominente figuur by die vergaderings met plaaswerkers nadat gewelddadige plaaswerstakings in die provinsie plaasgevind het.
Adv. Gesie van Deventer, burgemeester van die Drakenstein-munisipaliteit en mnr. Theuns Botha, Wes-Kaapse minister van gesondheid, onderskeidelik 22ste en derde, kan ook moontlike kandidate wees. Albei het ’n sterk landbou-agtergrond. Me. Helen Zille, die Wes-Kaapse premier, besluit self wie sy in haar kabinet aanstel.
