“Die Wes-Kaap ervaar reeds wegholveldbrande en die brandseisoen het pas begin,” sê me. Louise Wessels, bestuurder van die Groter Overberg-brandbeskermingsverening.
Sy sê dit is ’n duidelike teken dat daar ’n moeilike brandseisoen voorlê, veral ná die droë winter wat in die streek ervaar is.
“Die deurlopende bedreiging wat indringerplante inhou, maak dit nog moeiliker om brande onder beheer te kry. Saam met ’n veranderende klimaat, is dit duidelik dat dit al hoe moeiliker is om brande te bestry, en dit raak al hoe gevaarliker.”
Wessels sê dit is daarom noodsaaklik dat grondeienaars en lede van die vereniging so voorbereid as moontlik sal wees vir die komende seisoen. Die vereniging het regdeur die jaar gewerk om grondeienaars te ondersteun om hulle voor te berei. Sy raai grondeienaars aan om by hul plaaslike brandverenigings te gaan aanklop vir ondersteuning.
Sy bedank ook die brandweerdienste, wat die sleutelspelers is gedurende die brandseisoen, vir hul toewyding om brande in baie moeilike omstandighede te bestry. “Hulle lewer ’n noodsaaklike diens aan die hele gemeenskap.”
Sy bedank ook Agri Wes-Kaap en die provinsiale regering vir hul ondersteuning aan die boere.
Volgens die Groter Overberg-brandbeskermingsverening moet boere voorbereid wees met die regte toerusting.
Noodsaaklikhede
Vir enigeen, wat boere en hul arbeiders insluit, is daar ’n paar minimum vereistes waaraan voldoen moet word of wat byderhand gehou moet word wanneer hulle in of naby ’n brand is:
- Leerskoene.
- Leerhandskoene.
- Alle oorpakke, veiligheidsdrag of jeans moet van 100% katoen vervaardig word.
- ’n Bottel drinkwater.
- ’n Flits vir wanneer dit donker is.
Geen rubberstewels, oop skoene of plakkies, poliëster- of nylonklere, sweetpakke of kortbroeke moet deel wees van jou kleredrag wanneer jy of jou werkers met of naby aan ’n brand werk nie.
Bykomende toebehore wat nuttig is, maar nie noodsaaklik is nie, sluit in:
- Leerveiligheidskoene.
- Langmouhemde of oorpakke van katoen.
- ’n Warm bostuk of windjekker vir na die tyd of tydens observasie.
- Sweis- of braaihandskoene.
- Veiligheidsbrille.
- ’n Hoed (van 100% katoen) of hardehoed met ’n kenband.
- Bandana om jou mond en neus te bedek.
- Koplig vir die aand.
- Twee liter drinkwater.
- Energiedrankies.
- Hoë-energieversnaperinge.
Verkieslik moet geen juweliersware gedra word nie.
Eie toerusting
Die vereniging se raad vir boere of grondeienaars wat hul eie gly-eenheid of sogenoemde bakkiesakkie wil koop of bou, is om die volgende spesifikasies te volg:
- Die tenk se kapasiteit moet ten minste 500 liter wees.
- Gebruik of ’n enkel- of tweefase-sentrifugale pomp.
- Ten minste twee lengtes 25 mm-seilplatlêbrandslange.
- ’n Brandslangspoel met minstens 30 meter treklyn (opsioneel).
- Gebruik Geka-koppelstukke op al jou brandslange.
- Hou ’n bykomende 40 mm-inlaat met ’n 40 mm- manlike koppelstuk byderhand vir die pomp.
- ’n 3-5 meter lange 40 mm-suigbrandslang met ’n filtreerder aan die een punt en ’n vroulike koppelstuk aan die ander punt. Dit sal jou in staat stel om aan die pomp se inlaat te verbind en om jou bakkiesakkie-eenheid uit ’n dam vol te maak.
Besoek die vereniging se webblad by https://overbergfpa.co.za/the-right-equipment/ vir nog inligting.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
