Die voorstelle van die paneel is onlangs bekend gemaak. Me. Barbara Creecy, minister van omgewingsake, bosbou en visserye, het die paneel in Oktober 2019 in die lewe geroep.
Mnr. Narend Singh, IVP-LP, wou in ’n parlementêre vraag by Creecy weet wat die vordering is met die toepassing van die paneel se voorstelle rakende geblikte leeus. Die paneel het voorgestel dat leeus nie in aanhouding geteel en aangehou moet word nie.
Creecy het gesê dat die proses begin is om ’n voorgestelde beleidsposisie te ontwikkel. Die administratiewe voorstelle van die paneel sal deur ander prosesse hanteer word. Die departement van omgewingsake, bosbou en visserye het ook ’n proses begin om vir konsultasie ’n witskrif vir die bewaring van biodiversiteit en volhoubare gebruik te ontwikkel.
Konsultasie
Sy het benadruk dat die toepassing van die 60 voorstelle van die paneel voorafgegaan sal word deur konsultasie met die publiek en belanghebbendes van die staat, en ander nodige prosesse om te verseker dat elkeen doeltreffend toegepas kan word.
Sy het gesê vanaf die 2021-’22-boekjaar sal elke boekjaar gedeeltes van die voorstelle ingestel word. Die voorstelle en doelstellings sal deel uitmaak van die departement se strategiese plan vir 2024.
Die departement van landbou, landelike ontwikkeling en grondhervorming sal verantwoordelik wees vir die ontwikkeling van primêre wetgewing rakende die welstand van diere. Die departement het die voorgestelde wysigingswetsontwerp op dierewelstand ontwikkel, wat ’n bygewerkte weergawe van die huidige wetgewing oor die welstand van diere is.
Die bepalinge in die voorgestelde wetgewing sal van toepassing wees op mak en wilde diere. Wetgewing oor nasionale biodiversiteit sal ondersteunende bepalings bied vir die welstand van wilde diere en daarom is wysigings voorgestel vir die Wet op Nasionale Omgewingsbestuur: Biodiversiteit (Wet 10 van 2004).
? In 2018 het die departement ’n seminaar by die parlement aangebied waar insette gekry is oor Suid-Afrika se praktyke met geblikte leeus nadat internasionale bewaringsorganisasies hom daaroor voor stok gekry het. Dit het die vraag laat ontstaan of die praktyk Suid-Afrika se goeie naam rakende bewaringsaksies skade berokken. Dit het aanleiding gegee tot die stig van die paneel wat na kwessies van nie net leeus nie, maar ook olifante, luiperds en renosters moes kyk.
