“Piet is nie ’n renosterstroper of smokkelaar nie,” sê mnr. Piet Warren, die bekende mega-boer en kennis van mnr. Pieter Van Zyl, ’n gesiene boer van die Mokopane-omgewing wat onlangs saam met twee ander mans, mnre. Marco Swanepoel en Stephan Mylie, in hegtenis geneem en aangekla is vir die onwettige besit van en handel in renosterhoring.
Die drie is glo deur ’n agent van die Valke in ’n lokval gelei en het probeer om vyf renosterhorings aan hom te verkoop kort voor hulle gearresteer is. Die Valke se woordvoerder, brig. Hangwani Mulaudzi, sê by verdere ondersoek is daar later op nog 105 horings by ’n huis in Equestria in Pretoria afgekom.
Die eenheid is tans besig om Van Zyl se permitte vir die besit van hierdie horings na te gaan en om DNS-monsters van die horings te neem en dit te vergelyk met die RhoDIS-databasis by Onderstepoort. Warren sê die horings is afkomstig van 95 renosters wat Van Zyl wettiglik besit. “Piet het Tops-permitte vir almal.”
Daar mag tans egter nie handel gedryf word met renosterhoring nie, selfs al word dit wettiglik besit en al het die Hoë hof omgewingsminister, me. Edna Molewa, se moratorium op binnelandse handel ter syde gestel. Beide die Hoë hof en die Appèlhof het ook reeds haar aansoek om appèl teen die tersydestelling afgekeur.
Molewa het haar intussen tot die Konstitusionele hof gewend en daar word verwag dat dié hof enige dag sal sê of haar appèl mag voortgaan of nie. Tot dan mag daar geen handel gedryf word met renosterhoring nie.
Intussen moes Van Zyl die afgelope vyf weke glo sewe aanvalle op sy renosters afweer. “Elke keer het die stropers gevlug, net om ’n paar dae later terug te kom. Dit nadat daar al amper 10 renosters by hom gestroop is die afgelope jaar of twee,” sê Warren.
Mnr. Pelham Jones van die Suid-Afrikaanse Renostereienaarsvereniging sê hoewel dié organisasie geen onwettige aktiwiteite goedkeur nie, hy empatie het met boere se desperaatheid. “Die meeste van ons voer ons renosters deur die grootste droogte in 100 jaar en beskerm hulle ten duurste teen onwettige stropers sonder dat ons ’n sent kan verdien. Boere trek noustrop en kan in die versoeking gelei word met onwettige transaksies. Dit is waarom ons so hard teen die minister se moratorium baklei.”
Van Zyl, Swanepoel en Mylie het reeds in die streekhof in Pretoria verskyn. Van Zyl is op borgtog van R20 000 vrygelaat en Swanepoel en Mylie elk op borgtog van R10 000. Die drie verskyn weer op 12 Oktober in die hof.
