Grondhervorming moet radikaal plaasvind om grond na hul regmatige eienaars oor te dra, het die LUR vir landbou in die Vrystaat, me. Mamiki Qabathe, in haar repliek gesê.
In ’n nuusverklaring sê die Vryheidsfront Plus dat mnr. Wouter Wessels, LP, gister tydens die begrotingsposdebat van die provinsiale departement van landbou daarop gewys het dat die grootste bedreiging vir landbou in Suid-Afrika wanpersepsies en veralgemening is.
Hy het gesê dis verkeerd om te dink dat alle swart boere misluk, maar dat dit ook net so verkeerd is om te dink dat alle wit boere ryk is en dat alle wit boere hul werkers sleg behandel en sleg betaal.
Wessels het daarop gewys dat die kwessies rondom grond rasioneel en sonder veralgemening aangespreek moet word. Alle wit mense besit nie grond nie en grond bring nie outomaties welvaart en rykdom nie. Dit is ook nie vandag maklik om te boer nie.
Daarn het Qabathe glo in haar repliek gesê dat Suid-Afrika wel ’n landbouland met goeie landbougrond is, maar dat wit boere goeie grond onproduktief maak en nie benut nie. Sy het gesê dat grondhervorming radikaal moet plaasvind om grond na hul regmatige eienaars oor te dra.
