Die wolmark het 2,8% op die weeklikse veiling in Port Elizabeth gestyg, en Cape Wools se Merino-aanwyser het met 431 punte verhoog. Die mark het op die vorige veiling met 5,2% verbeter.
Dit mark het op R158,85/kg (skoon) gesluit. Op die Australiese mark was die aanwyser 1,8% hoër, terwyl Cape Wools se Alle Wol-aanwyser met 3,5% gestyg het.
Cape Wools sê in 'n nuusverklaring die mark verhandel nou bokant die 15,000 (skoon)-vlak en die verwagting is dat dié vlakke sal voortduur vir die res van die seisoen. Die mark verwag ‘n verdere daling in wol aanbiedings teen die einde van seisoen.
Die kompetisie tussen kopers was uitstekend, veral op die fyner en beter gehalte wol. Altesaam 97,9% van die 14 123 bale wat aangebied is, is verkoop. Die grootste kopers op die veiling was Lempriere SA (4 346), Modiano (4 184), Standard Wool SA (3 089) en Stucken & Co (1 475).
Die volgende veiling is geskeduleer vir 25 Januarie 2017 wanneer sowat 9 933 bale onder die hamer kom.
