Wolpryse het weer gestyg - ondanks ’n sterker rand. Cape Wools se Merino-aanwyser het op die weeklikse veiling gestyg met 4,5% tot R101,65/kg (skoon) vergeleke met verlede week.
Dié oplewing word toegeskryf aan groter belangstelling, moontlik met die oog daarop om voorraad vóór die Kersreses aan te vul. Die styging is in navolging van die Australiese mark, waar pryse ook verbeter het.
Die rand het met sowat 1,3% teenoor die Amerikaanse dollar versterk, vergeleke met die gemiddelde koers op verlede week se veiling en was ook 1,7% sterker teenoor die euro.
’n Hoër verkooppersentasie is ook aangeteken toe 97% van die 10 969 bale wat aangebied is, verkoop is.
Lang, vagwol van gehalte was weer hoog in aanvraag en die gemiddelde pryse vir sommige mikronkategorieë het met tot 5% gestyg.
Die gemiddelde skoonwolpryse van lang, kamwoltipes (MF5) van gehalte was soos volg: 19 mikron styg met 3,2% tot R118,76/kg, 20 mikron was 3,8% duurder op R108,85/kg, 21 mikron verbeter met 5,2% tot R107,93/kg, maar 22 mikron daal met 1,3% tot R99,47/kg.
Sowat 14 000 bale sal volgende week, die laaste veiling voor die Kersreses, aangebied word.
30 November 2011
