Die opwaartse neiging in die wolprys het op gister se veiling voortgeduur en Cape Wools Merino-aanwyser het met 2,0% gestyg en op R113,21/kg (skoon) gesluit.
Me. Ria van Rooyen, wolwaardeerder van Cape Wools, sê dié prys is 1,4% hoër as die openingsveiling maar 1,3% laer as die ooreenstemmende verkope van die vorige seisoen. Die Australiese mark het die neiging gevolg en die aanwyser het met 1,0% gestyg.
Kopers se vertroue het verbeter as gevolg van 'n verbeterde gehalt- aanbieding op gister se veiling en die swakker rand het verder tot ondersteuning van die wolmark bygedra. Daar was stewige mededinging uit alle sektore van die bedryf en uitstekende vraag na goeie gehalte lang vagwol Merinotipes van 19,0 tot 19,5 mikron.
Die rand was gemiddeld R11,21 teenoor die Amerikaanse dollar, 0,9% swakker teenoor die gemiddelde koers van verlede week. 'n Verkoopspersentasie van 97% is behaal van die 10 200 bale wat op die veiling aangebied is. Die grootste kopers op die veiling was Lempriere SA (2 612), G Modiano SA (2 463), Standard Wool SA (2 244) and H Dawson Sons & Co (1 225).
Die gemiddelde skoonwolpryse vir die seleksie binne die verskillende kategorieë goeie, lang kamwoltipes (MF5) was soos volg: 18 mikron daal met 1,3% tot R119,10/kg, 19 mikron versterk met 2,7% tot R119,40/kg, 20 mikron styg met 2,8% en sluit op R114,57/kg, 21 mikron versterk met 3,1% en sluit op R113,44/kg en 22 mikron styg met 2,6% tot R112,91/kg.
Die volgende veiling is geskeduleer vir 19 November wanneer sowat 12 000 bale onder die hamer sal kom.
