Parstyd in die Wynland het pas begin en ten spyte van ’n versengende hittegolf, is wynboere optimisties oor vanjaar se oes.
Temperature van tot 45 ?C is verlede week in verskeie wynproduserende gebiede gemeet. Hoewel die rypwordingstoestande tot dusver heel gunstig was, meen wynboere die hittegolf gaan sy spoor op die volume en gehalte laat.
Besproei
Mnr. Danie de Wet van die landgoed De Wetshof naby Robertson sê die hitte is sleg, want dit “druk” die druiwe ryp, terwyl al die ander elemente nog nie gereed is nie. Hy sê die enigste raad is om gereeld te besproei.
Oor weerberigte wat ’n uitsonderlike nat Februarie, Maart en April voorspel, sê De Wet: “As dit so is, moet ons pars dat dit bars.” Siektedruk sal die hoogte inskiet as die hittegolf deur nat toestande opgevolg word.
“Die plante is reeds verwelk en die skil verlep weens die hitte en dus meer toeganklik vir enige swam om dit te penetreer,” verduidelik De Wet.
Mnr. Jean Engelbrecht van Rust en Vrede op Stellenbosch sê sulke nat toestande sal die rooiwynkultivars se korrels laat swel en witwynkultivars se korrels laat bars. Dit sal ook ’n invloed op wyngehalte hê en kelderkapasiteit onder druk plaas.
Hy sê die rooiwynoes is sowat twee weke laat.
Nat toestande groter kommer
In die Oranjerivierstreek ervaar boere sedert Januarie temperature van sowat 40 ?C, maar mnr. Henning Burger, hoof van die wingerdboukundige diens by Oranjerivier-wynkelders, sê hulle beskou dit nie as hittegolftoestande nie. Hy is eerder bekommerd oor die voorspelde nat toestande.
“Ons is ’n somerreënstreek, maar as ons nou baie reën gaan kry, kan dit die wyngehalte benadeel – dan praat ek nie eers van die rosyntjiebedryf wat warm, droë toestande nodig het nie.”
Die kelder het verlede week sy eerste wyndruiwe ingeneem en Burger is in sy skik met die gehalte. “Ons het ’n koel Oktober en November gehad en die druiwe het hoë sure.” Hy verwag ’n oes van gemiddelde grootte.
23 Januarie 2012
