‘n Vooraanstaande tabakboer van Zimbabwe is op sy plaas in die Chegutu distrik, naby Harare, vermoor.
Luidens ‘n berig in Beeld is mnr. Kobus Joubert, ‘n voormalige voorsitter van die Zimbabwiese tabakkwekersvereniging, vroeg Dinsdagoggend (26 Oktober) doodgeskiet.
Joubert was in sy 70’s, en een van die sowat 20 boere wat die afgelope 10 jaar in Zimbabwe vermoor is. Die aanval was na verwagting blote misdaad, eerder as polities van aard.
Joubert se vrou, Mariaan, het kort ná middernag ’n geraas gehoor, en toe sy gaan ondersoek instel het, is sy deur twee gewapende mans aangeval. Sy wou skree om haar man te waarsku, maar die mans het haar gedwing om stil te bly. Luidens ‘n verklaring van die Commercial Farmers’ Union (CFU) het sy later ‘n enkele skoot uit die slaapkamer gehoor.
Vrou is aangerand
Me. Joubert het glo weer geskree waarna sy deur die aanvallers aangerand is en haar handsak, ‘n onbekende bedrag Amerikaanse dollar, drie selfone en ‘n skootrekenaar gesteel is.
Intussen het 13 boere in Zimbabwe, wat van Nederland afkomstig is, ‘n Amerikaanse hof genader om geld en bates van vier maatskappye in Zimbabwe, asook die reserwebank en die regering te eis. Luidens ‘n berig op AllAfrica is dié boere se plase ook vir grondhervorming geoormerk.
Die boere het die aansoek in die suidelike distrikshof van New York ingehandig, waarvolgens hulle vergoeding van sowat 10 miljoen Euro vir hulle plase en beweegbare bates eis.
Bronne:
27 Oktober 2010
