Hierdie toekenning gee erkenning vir die suksesvolle vestiging van ClemenGold® se internasionaal geregistreerde handelsmerk en die uitbou van ’n mark vir mandaryne in China. John Hey, redakteur van Asiafruit Magazine, sê die handelsmerk word hiermee beloon vir volgehoue bemarkingsbelegging en -insette sedert 2013. Asiafruit Magazine is die medeborg van hierdie varsproduktehandelskou.
In Suid-Afrika het die handelsmerk sedert 2006 ’n ekslusiewe leweringsverhouding met Woolworths en het verbruikers die handelsmerk leer ken vir sagtesitrus van topgehalte, en ’n konstante en uitsonderlike geurprofiel.
Sedertdien het die handelsmerk landsgrense oorgesteek. Dit is tans beskikbaar in 42 lande by meer as 100 kliënte. ClemenGold® het in 2013 sy voelers na China uitgesteek om die mark te toets. Van 2019 tot 2021 het verkope sesvuldig gegroei. Ontvangers van die vrugte sluit groothandelaars en varsproduktemarkte in, asook van die land se toonaangewende kettingwinkels.
“Met hierdie toekenning gee ons erkenning aan ClemenGold® vir sy suksesvolle model waarvolgens hy groot- en kleinhandelsvennote identifiseer wat die benadering aanvaar dat ’n sterk en bekende handelsmerk verkope aandryf. ClemenGold® se bemarkingspan ondersteun hierdie vennote dan met verkoops- en bemarkingskundigheid en -materiaal om verbruikers nader te lok en aan te moedig om te koop. ’n Verskeidenheid innoverende aktiwiteite sluit in indrukwekkende winkeluitstallings, vermaaklike verbruikersgeleenthede en proe-sessies,” sê Hey.
“Die toekenning is grootliks ook te danke aan die geesdrif van ons Chinese invoerders,” meen Adéle Ackermann, bemarkingsbestuurder van Fruitalyst, die kommersialiserings-en-bemarkingsmaatskappy agter die ClemenGold®-handelsmerk. “Die kreatiewe en toegewyde wyse waarop hulle elke seisoen interaksie skep tussen hierdie handelsmerk en verbruikers, word hoog op prys gestel. Hulle laat die ClemenGold®- handelsmerkstorie waarlik lééf op die rakke in China! Vir ons is die toekenning ’n bewys dat hierdie gehoor by ons strategies ontwikkelde bemarkingsboodskappe en -metodes aanklank vind. En dit vorm deel van ons kernstrategie: om direk met verbruikers kontak te maak en kultuur-toepaslik met hulle te kommunikeer.
“Ons bedank natuurlik ook ons platform van eensgesinde produsente en verpakkingsvennote wat ons help om by ons beloftes te hou ten opsigte van gehalte en lewering volgens beplande skedules.”
Volgens Ackermann deel die span graag die toekenning met die hele waardeketting. “Hierdie toekenning vier almal se insette om uiteindelik ’n wêreldklas-ClemenGold-mandaryn in ’n sitrusliefhebber se hande te sit.”
Die groeiende gewildheid van ClemenGold®-mandaryne in China het die deur oopgemaak vir die bekendstelling van pitlose LemonGold®-suurlemoene van Suid-Afrika en ander mandarynhandelsmerke soos Sweet C en ClemenOrange wat vinnig veld wen en deur verskeie verbruikers verwelkom word.
