Boere is reeds besig met die 2023-seisoen en data speel ’n groot rol in die beplanning en gladde uitvoer van planttyd. Mnr. Leonard Oberholzter, Bayer se mieliestrategiebestuurder vir Afrika, glo ’n produsent wat visueel na sy data kan kyk, sal groter sukses behaal.
“Dis maklik om na data te kyk wat in ’n klomp tabelle is, maar wanneer jy dit op ’n kaart sien soos wat FieldView dit bied, kan jy deur die seisoen ’n beter idee kry van wat gebeur. Sulke inligting is baie meer kragtig. Dit stel jou in staat om intydse besluit te neem en te sien watter regstellings jy moet maak.” sê hy. “Aan die einde van die seisoen kan jy ook meet hoe alles presteer het en daarvolgens besluite neem oor jou beplanning vir die volgende seisoen.”
In praktyk
Oberholzter het saam met die Landbouweekliks-span mnr. PN Basson se Janelda-boerdery buite Pretoria, Gauteng, besoek. Hierdie is die derde seisoen dat Basson FieldView inspan tydens sy planttyd en Oberholzter het hom gevra hoe die gebruik daarvan sy prosesse verander het.
“Dit het ’n groot verskil gemaak aan ons beplanning vir ’n seisoen. Jy neem die vorige seisoen se inligting, ontleed dit tot op die ry wat jy geplant het, en sien dan wat gebeur het onder die verskillende omstandighede op jou land,” sê Basson.
Basson probeer soveel moontlik om van FieldView gebruik te maak.
“Benewens die gebruik van plantkaarte om variërende plantestand te kan plant, en stroperkaarte om sien wat die verskillende opbrengste in die land is, het FieldView ’n baie lekker ding wat hulle ’n scouting map noem. Hiermee kan ek deur die loop van die seisoen op ’n satellietbeeld sien hoe dit op my land gaan. Dit help ontsettend baie met onkruidbestryding en om te sien waar probleemkolle in die grond is.”
FieldView speel ook ’n rol as dit kom by insetkostebesluitneming.
“Dit help om die koste van kunsmis en saad doeltreffend te bestuur. Ons kan byvoorbeeld wisselende kunsmiskaarte skryf en dan meer kunsmis toedien op grond met hoër potensiaal. Waar die grond nie die oespotensiaal het nie, gaan jy minder kunsmis toedien.”
Vir kultivarkeuses is FieldView ook vir Basson van onskatbare waarde. Omdat hulle ’n variërende stand plant, kan hulle met FieldView sien hoe ’n baster presteer in die spesifieke grond waar hy geplant is. Hulle kan dus beter besluite neem op die stand wat hulle die volgende seisoen gaan plant.
“Jy kan dit sommer alles aan die einde van een seisoen sien, jy hoef nie verskillende stande te plant of proewe oor drie jaar te doen om te besluit watter baster jy wil plant nie.”
Van groot hulp
Basson beveel FieldView aan vir boere wat dit nog nie gebruik nie. “Dit is ’n ongelooflike hulpmiddel om jou te help met besluitneming op jou plaas om kostedoeltreffender te boer. Die groot voordeel van FieldView is ook dat dit aanpasbaar is op enige platform. Enige trekker kan met FieldView praat.”
