Vir mnr. Louis Opperman, van Danlohan-boerdery by Bapsfontein in Gauteng, speel FieldView ’n belangrike rol tydens voorbereiding vir planttyd. Dit help hom met sy besluitneming oor van kultivarkeuse tot bemestingbestuur.
Mnr. Stephan Janse van Rensburg, Bayer se digitale en klimaatsbestuurder vir Afrika, het saam met die Landbouweekliks-span dié boerdery tydens die voorbereiding vir planttyd besoek om uit te vind hoe FieldView help met dié proses.
Met hul aankoms op die plaas was Opperman reeds besig met kalktoediening, regstellings en die uitgooi van voorplantkunsmis sodat die grondvoeding reg is vir wanneer dit reën en hy kan begin plant.
“FieldView is tydens hierdie proses vir ons ’n waardevolle stesel. Dit help ons met ons keuses – van kultivars tot die kunsmis wat ons toedien. Die data wat ons van een seisoen na die volgende gebruik, help ons om goeie besluite te neem,” sê Opperman.
Een van die kenmerke van FieldView is die stelsel se veelsydigheid.
“FieldView werk op enigiets met Isobus-integrasie. Jy konnekteer dit en stel alles op jou iPad op deur op jou Cab-toepassing te gaan. Daar klik jy op ‘Equipment’ en kies dan ‘Add new equipment’. Dis baie eenvoudig,” verduidelik Janse van Rensburg.
Opperman beaam dat dit maklik is om te gebruik. “As jy met ’n slimfoon kan werk, kan jy FieldView gebruik.”
Sodra dit gedoen is, vul jy die werktuig se spesifikasies in. Nadat alles gelaai is, klim jy in jou trekker, kies jou toepassing en FieldView vang die data vas soos jy ry.
Vir Opperman is dit lekker om in die kajuit presies die verskillende vlakke van toediening te sien.
“Jy kan dadelik sien as daar fout is op jou toepassing. Dit wys nie die regte kleur nie en jy weet dus die korrekte hoeveelhede is nie gelewer nie. Ek vind ook dat die stelsel baie akkuraat is.”
FieldView het ook ’n opsie wat dit vir die boer moontlik maak om die vordering oor ’n afstand dop te hou. Deur hierdie opsie te gebruik word dit wat in die trekker wys, gedupliseer op die boer se iPad-skerm. Hy kan sodoende sien wat die spoed is waarteen gery word, wat toegedien word en teen watter tempo. Indien daar fout gaan en die trekker staan stil, sal die boer dit ook kan sien.
FieldView is ’n veelsydige stelsel wat op verskillende werktuie toegepas kan word en maklik om op te stel. Dit maak dit vir die boer moontlik om op enige plek te wees waar daar ’n sein is en steeds presies te sien wat op sy plaas aangaan.
