Die diens wat FPS Bulk Diesel aan sy klante bied, is net so belangrik soos die gehalte van die produk wat hy verkoop. Vir mnr. Koos Uys was hierdie beginsel waarvolgens FPS sake doen ’n wenresep. Danksy FPS Bulk Diesel het dié Standerton-boer ’n splinternuwe hommeltuig gewen, wat die lewe op sy plaas vergemaklik.
Uys sê hy gebruik al baie jare lank Shell se olie, want hy glo in die gehalte daarvan en dat sy werktuie goeie werkverrigting daarmee kry. Vir sy Shell-produkte klop hy aan by die dieselverspreider FPS Bulk Diesel. Die diens wat dié manne aan hom lewer, is onverbeterlik, sê hy.
Met die koop van ’n drom olie by hulle het hy dié keer meer ontvang as waaroor hy kon droom. Die FPS-verteenwoordiger op Standerton, mnr. Johan du Toit, het aan Uys voorgestel dat hy inskryf vir Shell se Farm of the Future-kompetisie. Op die spel was ’n R500-geskenkbewys om by enige Shell-vulstasie te gebruik en ’n DJI Mavic 3-hommeltuig.
“Ek wen nie gewoonlik goed nie, maar ek sê toe vir hom hy kan my inskryf. Dit was vir my groot verrassing om te wen,” sê Uys.
Hy het benewens die hommeltuig ook een van die agt geskenkbewyse gewen. Vir Uys gaan die hommeltuig sy lewe op die plaas vergemaklik. Hy boer op die plaas Rietpoort in die Standerton-distrik saam met sy twee seuns, Hannes en Kobus. Hulle boer met mielies, sojabone en Brangus-beeste. Hoewel hulle reeds ’n klein hommeltuig het, is die Mavic groter en dit het meer eienskappe. Dit het byvoorbeeld ’n lig wat nuttig is vir wanneer Uys saans die beeste dophou.
“Ons gebruik ’n sekuriteitshalsband aan ons beeste wat alarm maak wanneer hulle gejaag word. Nou kan ons eerder die hommeltuig opstuur om te gaan verken as om self in ’n moontlik gevaarlike situasie te beland.”
Nog ’n voordeel van die hommeltuig is dat hulle ook hul tweede plaas kan “besoek” – selfs al is die rivier tussen die twee plase in vloed. Hoewel die afstand net 6 km is, moet die Uyse ’n ompad van byna 60 km ry as die rivier sterk vloei.
Die hommeltuig vlieg ook oor die landerye om te kyk vir swak kolle.
Shell ploeg terug
Met die Farm of the Future-veldtog wys Shell sy ondersteuning vir die boere van Suid-Afrika.
“Shell is al baie lank by die landboubedryf betrokke. Dit is een van die sleutelbedrywe wat ons ondersteun,” sê mnr. Hein Venter, senior tegniese adviseur vir smeermiddels by Shell. “Dit is vir ons belangrik om seker te maak ons smeermiddels voldoen aan die vereistes wat toerustingvervaardigers stel. Shell is trots daarop dat ons aan al die groot vervaardigers s’n voldoen. Boere kan met ’n geruste hart Shell se smeermiddels in hul toerusting gebruik.”
Hy raai boere aan om met ’n tegniese persoon by Shell of by verspreiders te gesels om die beste raad te kry.
Om goeie tegniese bystand te gee, is deel van die uitstekende diens wat FPS Bulk Diesel streef om vir sy kliënte te gee.
“Die kliënt se tevredenheid is vir ons die heel belangrikste. Dit help nie jy smeer ’n swak produk aan hom af nie,” sê Du Toit. “Jy moet ’n goeie produk lewer wat gewaarborg is en uitstekende diens gee, hy wil nie dae lank wag vir sy bestelling nie.”
Mnr. Antonie Brelage van FPS Bulk Diesel sê die feit dat hulle in die boeregemeenskap woon en werk, is lekker omdat hulle persoonlike verhoudings met hul kliënte opbou en elkeen se behoeftes dus ken.
Dit, tesame met Shell se topgehalte-produkte wat hulle versprei, maak hulle ’n voorkeurverskaffer vir boere in Mpumalanga, KwaZulu-Natal, die Vrystaat en Gauteng.
