Om met beperkte uitgawes sy kudde te kan uitbrei, die maksimum opbrengs per hektaar te kry en daardeur die boer se winsgewendheid te verbeter, is die hoofrede waarom die Meatmaster-skaapras so sterk verteenwoordig word reg oor Suid-Afrika en ook in die res van Afrika.
Hierdie skaapras word geteel vir vleisproduksie sonder ’n vetstert. Dit is egter sy aanpasbaarheid en vermoë om goed te produseer in uiters ongunstige omstandighede wat hom baie gou gewild en aanvaarbaar in die kleinveebedryf gemaak het.
Die Meatmaster-skaaptelersgenootskap is op 4 Februarie 2005 op Brandfort in die Vrystaat gestig. Op 25 Mei 2007 is die Meatmaster amptelik in die Staatskoerant verklaar as ’n plaaslik aangepaste skaapras. Vandag het hierdie telersgenootskap 226 lede landwyd.
’n Deel van die Meatmaster-telersgenootskap se plan om die ras se gewildheid uit te brei was die stigting van nasionale klubs. Hierdie klubs tree onafhanklik, maar binne die raamwerk van die genootskap op.
“Dit verseker dat ons al die telers, boere en belanghebbende partye op grondvlak bereik en sodoende kennis oor die ras in daardie gebiede versprei,” sê Charles Freeme, president van die Meatmaster-skaaptelersgenootskap. “Die uiteenlopende topografie van Suid-Afrika maak dit nodig vir elke klub om die spesifieke kriteria en boermetodiek te volg wat uniek is aan elke klub. Die groei en aanvaarding van die klubs is ongelooflik. Een sterk klub in Gauteng het byvoorbeeld uitgebrei na vier klubs toe.”
Die genootskap ondersteun die klubs op alle vlakke – van veilings en boeredae tot uitstallings en opleidingskursusse.
“Om die klubs te bemagtig en verantwoordbaarheid te gee, bevorder groei en aanvaarding in elke streek. Die beloning wat ons in ruil daarvoor ontvang, is fantasties.”
Hoewel Meatmasters in die verlede na buurlande soos Namibië en Botswana uitgevoer is, is daar tans weens bek-en-klouseer ’n verbod daarop geplaas.
“Dit het ’n groot impak op ons telers gehad omdat ons goed gevestigde genootskappe in daardie lande het,” sê Freeme. “Ons het ook deur private telers na die wêreldmark uitgevoer. Die genootskap is tans in gesprek met lande elders in Afrika en die Midde-Ooste oor die uitvoer van Meatmaster-skape vir gebruik in hul teelprogramme.”
Die Meatmaster-telersgenootskap het talle mylpale in 2022 bereik, waarvan een die talle Elite-toekennings van SA Stamboek is wat sy telers verower het. “Dit is ’n bewys dat ons telers ’n passie het om topteelmateriaal teen verantwoordbare waardes aan die bedryf te lewer,” sê Freeme.
Hy noem ook as ’n hoogtepunt van die jaar die ras se uitsonderlike groei in die kleinveebedryf, veral op kommersiële vlak is die Meatmaster reg oor Suid-Afrika versprei.
“Ons ramme word in kruisteelprogramme gebruik en lewer uitstekende resultate wat daartoe lei dat daardie boere in Meatmaster-teelmateriaal belê.”
As deel van die genootskap se strategie vir 2023 om die ras landwyd te bemark, beoog hy ’n sterk teenwoordigheid op die Nampo-oesdag en Nampo Alfa. Daar is ook vanjaar heelwat veilings, waarvan die datums op die webblad beskikbaar is. Die hoogtepunt op die kalender is die genootskap se jaarvergadering en nasionale veiling wat op 10 Augustus om 11:00 in Bloemfontein plaasvind.
