Nuwegenerasie-produsente kan nou aansoek doen vir toelating tot die Kaap Agri Akademie se landbou-ontwikkelingsprogramme vir 2023. Om tot die transformasie van die Suid-Afrikaanse landbou by te dra, konsentreer die Akademie daarop om nuwegenerasie-produsente met kennis, vaardighede en praktiese ondervinding toe te rus sodat hulle in die toekoms suksesvolle kommersiële produsente kan word.
Toppresteerder
Lindy Kraak de Vos is 'n onlangse student wat self die voordele van opleiding by die Kaap Agri Akademie ervaar het. Lindy was een van 32 nuwegenerasie-produsente wat in 2021 by die Akademie gegradueer het. Sy was die toppresteerder in die plantproduksieprogram. Volgens Lindy het hierdie program haar die kennis en vaardighede gegee om die mark met selfvertroue te betree en 'n betekenisvolle bydrae in haar gemeenskap te lewer.
"Ek doen dinge nou anders. Ek beplan nou voor ek begin plant. En wanneer ek begin plant, het ek reeds die eindverbruiker of mark waarvoor dit bestem is, gereed. Ek weet nou hoe belangrik dit is om die grond te laat ontleed voor ons begin plant. En ons rekordhouding op die plaas het baie verbeter.”
Programkeuses
Studente kan uit drie programme kies:
· NQF 2-leerderskapprogram in gemengde boerdery;
· NQF 3-leerderskapprogram in diereproduksie; en
· NQF 3-leerderskapprogram in plantproduksie.
'n Gemengde onderrigformaat word vir die opleiding gebruik. Dit bestaan uit 'n kombinasie van aanlyn lesse, videogebaseerde onderrigting en verpligte praktiese opleidingsessies op Porterville.
Vereistes
Studente wat aansoek wil doen, moet in die Wes- of Noord-Kaap woon, moet al die sessies kan bywoon (hetsy dit aanlyn of in persoon is), en moes onlangs graad 12 behaal het en/of in 'n boerdery betrokke wees.
Koste
Studente sal geen toelae ontvang nie, maar alle opleidingskoste sal deur Kaap Agri gedek word. Daarbenewens sal Kaap Agri studente se vervoer-, kos- en verblyfkoste dek terwyl hulle opleidingsessies op Porterville bywoon. Die feit dat hierdie programme gesubsidieer word, maak die bemagtiging van nuwegenerasie-produsente moontlik en Kaap Agri is trots om 'n bydrae tot die transformasie van die Suid-Afrikaanse landbou te lewer.
Kursusrooster
Leerderskapprogramme sal in Maart 2023 begin en in Oktober 2023 eindig. Soos hieronder aangedui, sal suksesvolle kandidate vyf keer gedurende die verloop van die kursus tot vyf dae op 'n slag in Porterville moet deurbring.
Inleiding: Maart - 5 dae
Kontaksessie: Junie - 3 dae
Kontaksessie: September - 3 dae
Kontaksessie: Oktober - 3 dae
Praktiese sessie: Oktober - 5 dae
Alle opleidingsmateriaal is in Engels, maar die klasse word in Engels en Afrikaans aangebied om deelnemers in te sluit.
Sperdatum
Die sluitingsdatum vir alle aansoeke is 15 Januarie 2023.
Klik op die onderste skakel om af te laai:
