Vir die Boran-beestelersgenootskap sal dit groot vreugde verskaf as sy telers en hul nageslagte oor 20 jaar steeds presteer. As deel van hierdie visie vir die toekoms het die genootskap in 2022 vir prestasiemeting met raadgewers van Intalec Beef hande gevat. Deur middel van individuele plaasontledings en studiegroepe sal Intalec Beef data versamel en ontleed met die doel om die volhoubaarheid van die Boran-telersgenootskap se lede in die bedryf te verseker.
Die Boran-beestelersgenootskap is al sedert 17 Mei 2003 by SA Stamboek geregistreer. Vir die genootskap lê die waarde van diereaantekening by die Stamboek daarin om objektiewe produksie-inligting en teelwaardes te ontvang sodat die beste diere geïdentifiseer en geselekteer kan word. Danksy hierdie inligting word die biologiese en ekonomiese doeltreffendheid van die ras bevorder.
Deur na die belange van sy lede om te sien en die volhoubaarheid van sy telers eerste te stel het die Boran-beestelersgenootskap dit reg gekry om heelwat prestasies op sy kerfstok te kry. Van dié prestasies sluit in die LNR se Nasionale Kudde van die Jaar vir 2022 en SA Stamboek en Landbouweekblad se Elitekoei-toekenning vir 2021; wat SA Stamboek se Elite-toekennings betref, dubbelgoud vir Bloodline Borane en DD Brooks, en 18 telers wat goud, silwer, en brons verwerf het; en die wenner van die enkelkarkas- en beste groep van vier karkas-afdeling by Alfa 2021, met Jabea Boran as raswenner.
Die Boran-ras
Die Suid-Afrikaanse Boran-beestelersgenootskap is gestig uit ’n behoefte deur kommersiële boere wat moeg was vir diere wat te veel gevoer en bestuur word. Hulle het gesoek na ’n dier wat op weiding uitstekend presteer. Dit moes in Suid-Afrika se diverse klimaat oorleef en goed presteer tydens periodieke droogtes sonder menslike ingryping.
Wat toe in Suid-Afrika beskikbaar was, was twee uiterstes: aan die een kant was die perfekte karkasdier, maar dit het gekom met hoë onderhoud en uitgawes, en aan die ander kant die inheemse rasse wat weens abattoirboetes laer inkomste gelewer het en net nie aan markstandaarde voldoen het nie. Daar was niks tussenin nie. Die Boran het dié gaping gevul met ’n aanvaarbare karkas vir die mark met lae tot geen insetkoste en dus ’n hoër inkomste.
Die Boran is nie ’n sintetiese of saamgestelde ras wat in die afgelope paar dekades ontwikkel is nie. Dit word al 1 300 jaar raseg geteel. Dit het ontstaan uit die Bos indicus-beeste wat saam met Arabiese invallers na Oos-Afrika gekom het. Dis genoem na die Borana-plato in Suid-Ethiopië. Borana is ’n hooggeleë gebied met strawwe klimaatstoestande en voortslepende droogtes. Die ras is dus baie gehard en aangepas by ekstreme omgewings.
Die Keniaanse Boran-beestelersgenootskap is reeds in die vroeë 1900’s gestig om die ras te beskerm en te verbeter. Die Boran-beestelersgenootskap van Suid-Afrika is op 17 Mei 2003 gestig. Volgens die DNS-ontledings deur prof. Olivier Hanotte van Brittanje is die ras se samestelling tans 64% Bos indicus, 24% Europese Bos taurus en 12% Afrika Bos taurus.
Daar is tans meer as 35 000 Boran-stoetbeeste in net meer as 200 kuddes op SA Stamboek se Logix-databasis (September 2022). Die vyf grootste kuddes het meer as 900 diere elk, met die grootste kudde meer as 2 000 diere.
Stoetkuddes is versprei oor ál nege provinsies van Suid-Afrika, met die meeste kuddes en diere in die Vrystaat, Limpopo en Mpumalanga. Daar is ook kuddes in Eswatini, Zambië, Namibië en Botswana wat by die Suid-Afrikaanse Boran-beestelersgenootskap ingeskryf is.
Die Boran se nasionale veiling vind op 15 Julie op Parys plaas. Skakel die telersgenootskap se kantoor by 051 410 0951 vir nog inligting hieroor.
