Noordelike blaarskroei is die algemeenste mielieblaarsiekte in Suid-Afrika en veroorsaak skade van 15% tot 30% in optimale omgewingstoestande. Die syfer kan egter meer as 50% wees wanneer die siekte vroeg voorkom – rondom die V6-groeistadium – en die letsels versprei na die boonste blare tydens bestuiwing. Dit is juis hierdie blare, van die vlagblaar af boontoe, wat tot elke prys koste beskerm en gesond gehou moet word omdat hulle van 75% tot 90% bydra tot goeie graanvul en skepelgewig.
Simptome verskyn as lang, ovaalvormige, grysgroen letsels wat 2,5 cm tot 15 cm lank is en later verbruin. Noordelike blaarskroei is nie maklik om vroeg raak te sien en korrek te identifiseer nie. Die tipiese simptome is eers sigbaar 10 tot 14 dae ná besmetting – en dan is dit reeds te laat om dit te bespuit. Die enigste manier om opbrengspotensiaal te beskerm, is om te voorkom dat die siekte enigsins vastrapplek kry.
Noordelike blaarskroei hou van lang tydperke van hoë humiditeit en matige temprature (18 °C tot 25 °C), en floreer veral wanneer baie dou vir dae aaneen voorkom. Kultivars met ’n hoë opbrengspotensiaal kan veral vatbaar wees en as die siekte in die vorige seisoen voorgekom het, kan jy gewaarborg wees dat dit sal skade veroorsaak in die komende seisoen.
Noordelike blaarskroei oorleef in oesreste en nuwe spore word ná die eerste lentereën vrygestel. Die onderste blare word normaalweg eerste besmet. Hierdie primêre besmettings versprei dan opwaarts na die boonste, jonger blare om sekondêre besmettings te veroorsaak. Die siekte versprei deur reënspatsels en veral wind wat die spore oor lang afstande kan dra.
Noordelike blaarskroei veroorsaak opbrengsverlies omdat die letsels fotosintese belemmer. Hoe meer letsels op ’n plant voorkom en hoe vroeër in die seisoen die letsels ontwikkel, hoe groter is die verlies aan fotosinterende blaaroppervlak en, uiteindelik, opbrengs.
’n Boer kan noordelike blaarskroei doeltreffend bestuur deur weerstandbiedende basters te plant, minder mieliereste op lande te laat, op die regte tyd te plant en swamdoders voorkomend toe te dien.
’n Voorkomende toediening van MIRAVIS® Neo of AMISTAR® Top vroeg in die seisoen sal die onderste blare skoon hou en verseker dat die boonste blare tot aan die einde van graanvul groen en gesond bly. ARTEA® is ’n goeie aanvullende bespuiting later in die seisoen wanneer siektedruk hoog is en die plant se reproduktiewe fase beskerm moet word.
In gebiede waar noordelike blaarskroei soms voorkom en soms nie, is dit altyd goed om ’n voorkomende behandeling met AMISTAR® Top of MIRAVIS® Neo toe te dien. Nie net is die mielies dan beskerm teen wat die seisoen ook al inhou nie, maar albei middels verbeter die fisiologiese prosesse wat fotosintese beïnvloed. Plante sal dus water en stikstof beter opneem en benut, groen bly vir langer en oor die algemeen sterker en gesonder wees.
