Langs die pragtige dorp Montagu in die Wes-Kaap lê drie plase wat aan mekaar grens en saam te koop is. ’n Veiling vir dié drie uitvoervrugteplase word op 30 Maart om 11:00 by die Montagu Country Hotel deur Van Rensburgs Auctions aangebied.
Die plase Nuwedrift (119,2 ha), Helpmekaar (196,4 ha) en Rooiland (66,9 ha) is in die skilderagtige Klein-Karoo op Roete 62 tussen Montagu en Barrydale. Dit bied dus ook fantastiese geleentheid vir toerisme. Die grond saam beslaan 383 ha, waarvan 101 ha bewerkbaar is en 86 ha reeds beplant is.
Die drie plase is die afgelope 19 jaar sorgvuldig ontwikkel en meer as 40 ha se nuwe aanplantings is die afgelope ses jaar gedoen. Net meer as 50% van die plase is in produksie met ’n goeie verskeidenheid gehalte-pakvrugte vir die plaaslike en uitvoermark. Dit sluit in appelkose, perskes, pruime, sitrus en appels. Daar is ook jong wingerde met Shiraz- en Chenin blanc-druiwe.
Die vrugte word tans by die naburige Knipeshope Fruit Packers verpak en bemark deur Freshness First F1. Daar is ’n inmaakkwota met ’n gewaarborgde afset vir perskes by Rhodes Food Group. Die plaas Nuwedrift is ingelyf by die Montagu Wine and Spirits Company se Rietrivierkelder. Die plaas het ’n 130 ton-kwota vir Chenin Blanc en Shiraz. Die koper het ook ’n opsie om sy eie wyne onder sy eie etiket by die kelder te maak.
Die plase ontvang 135 ha se water van die besproeiingstelsels in die omgewing. Dit is verdeel in 102 ha van die Kogmaskloof-besproeiingsraad se kernkwota, 25 ha in die Kogmaskloof-besproeiingsraad se uitruilkwota, 10 ha van die Poortjieskloofkwota en twee kleiner opbergingsdamme.
Die boerdery is ’n lopende bate met uitgebreide infrastruktuur wat ’n volle reeks plaastoerusting, ander toerusting en voertuie insluit. Daar is ook ’n bestuurspan. Die geboue en strukture op die plaas bestaan uit onder meer twee wonings van 290 m² elk, ’n kothuis, asook plaasgeboue, werkershuise en ’n landingstrook vir vliegtuie. Die landingstrook is op die plaas Rooiland en het twee aanloopbane en drie vliegtuigskure.
