Rhenostervallei Beefmasters se doelstelling is om beeste te teel wat fenotipies en genotipies korrek is. “Daarom gebruik ons genomiese toetsing, ouerskapbepaling en streng seleksie op teelwaardes,” sê dr.
Hendrik Meyer, eienaar. Hy en sy vrou, Ronel, bedryf saam die Rhenostervallei-stoetery op die plaas Rhenostervallei by Pienaarsrivier, asook op die plaas Roodepoort op die Markenpad by Mookgophong in Limpopo.
“Goeie groei en melkeienskappe is belangrik. Baie waarde word geheg aan ons koeikudde. Ons selekteer koeie van medium- tot grootraam, met ’n wigvormige bouvorm, genoeg diepte, en goeie en korrekte uiers. Koeie wat genoeg been dra, is ook belangrik.”
Meyer, wat in 1982 as ’n veearts gekwalifiseer het, het Rhenostervallei Beefmasters in 2007 geregistreer. “Beefmasters is beeste met ’n goeie temperament en baie melk, het uitstekende groei, asook hoë vrugbaarheid en is boonop ‘mooi en sag op die oog’.
’n Boer moet van sy beeste hou,” sê Meyer. “Naspeurbaarheid is belangrik in ons teelbeleid. Ons moet weet watter bulle teel die beste kalwers, en dus bevestig ons ouerskap van alle kalwers wat op die plaas gebore word.
“Ons kudde het net een teelseisoen, en kalwers word in Mei en Junie jaarliks gespeen. Die ideaal is om ons kalwers op 205 dae te speen. Die ideale bulkalwers moet sowat 300 kg weeg, terwyl die ideale verse sowat 250 kg behoort te weeg.
“Ons volg jaarliks ’n streng inentingsprogram. Sedert die ontstaan van die stoetery toets ons kudde negatief vir brucellose en tuberkulose.” Hul jaarlikse stoetveeveiling word op 30 Augustus by die Warmbad-veemark gehou.
“Rhenostervallei Beefmasters se beleid is om geen minderwaardige diere op die veiling te verkoop nie. Diere wat nie aan die stoetery se standaarde voldoen nie, word nie verkoop nie, maar geslag.”
Rhenostervallei Beefmasters is van 2019 elke jaar aangewys as een van SA Stamboek se vleisbeeskudde-finaliste.
